Oiartzungo ipuin kontalariak etxeetaraino iritsiko dira
Lur Kortak ostegunean ipuin kontaketa saio digitala igoko du bere Youtubeko kanalera. Pello Añorgak eta Jokin Mitxelenak 'Tontolapiko' ipuina igo dute.
Lur Kortak prest du ipuin kontaketa saioa. Konfinamendu egoerak ohiko ohitura eta jarduerei buelta bat eman eta egoerari egokitzeko aukera eman du. Edo horretara behartu du. Naturak ezarritakora moldatzea da kultura.
Oiartzungo ipuin kontalalariek, bide horretan, buruari eragin, eta haurrengana iristeko bideak aurkitu dituzte. Lur Korta kontalariak etzi (osteguna, apirilak 2) ipuin kontaketa digitala eskainiko du, Manuel Lekuona bibliotekak antolatuta.
Apirilaren 2a Haur Liburuaren Nazioarteko Eguna da. Horregatik, 12:00etatik aurrera, Lur Kortak bere Youtubeko kanalera igoko du ipuin bat. Oiartzungo Udalak, bere sare sozialen bidez, partekatuko du saioa.
Tontolapiko
Bestalde, Pello Añorgaren testua eta Jokin Mitxelenaren ilustrazioak dituen Tontolapiko ipuina ere Youtuben dago ikusgai. Añorgak ipuina kontatzen duen bitartean, Mitxelenak marraztu egiten du.
