Irakurraldi jarraitua egingo dute Oiartzunen... modu digitalean
Aintzane Galardiren 'Hegodun poemak' liburua irakurriko dute. Apirilaren 6ra arte eman daiteke izena. Jasotako testua irakurtzen bideoa grabatu behar da.
Irakurketa jarraitu digitala antolatu dute Oiartzungo Irakurketa Taldeak eta OiartzunAurreak dinamikak, elkarlanean. Aintzane Galardiren Hegodun poemak liburua (Denonartean argitaletxea, 2018) irakurriko dute.
Horretarako hiru epe jarri dituzte. Lehenengoa, iniziatiban parte hartzeko izena ematekoa. Hilaren 6ra arte eman daiteke izena, e-posta bidez. Parte hartzeko interesa adierazita, liburuko poema bat helaraziko diote irakurleari.
Irakurleak hilaren 12ra arte edukiko du poema irakurtzeko epea. Bideo bat grabatu beharko du poema irakurtzen ari dela, eta e-posta helbide berberera bidali.
Bideo guztiekin muntaketa egin ondoren, poema sorta OiartzunAurrearen Youtubeko kanalera igoko dute. Liburu osoa hilaren 15ean egongo da ikusgai.
Galardik (Oiartzun, 1969) 2018an Iruña Hiria Nazioarteko Poesia Saria eskuratu zuen, euskarazko sailean.
