Lonjan segurtasun berme guztiak betetzen ari dira Portu Agintaritzaren arabera
Koronabirus izurriteak eragindako salbuespenezko egoera dela eta, segurtasun protokoloak egokitu dira eta lonjako erabiltzaile guztiei babeserako bitartekoak banatu zaizkiela ziurtatu du PPAk.
Lonjan segurtasun neurriak bermatzen ari direla ziurtatu du PPAk. Martxoaren 15ean, COVID-19 birusaren kontrol gabeko hedatzea eteteko alarma egoera ezarri zenetik, lantoki gehienek ateak itxi dituzte. Ez ordea, Pasaiako portuko lonja. Lehen sektoreko parte diren heinean, arrantzaleak arrain freskoaren hornidura bermatzeko lanean jarraitu behar dute eta ondorioz lonjak ere ateak zabalik jarraitzen du.
Pasaiako Portu Agintaritzak adierazi duenez, segurtasun berme guztiak betetzen ari dira lonjan, “kofradiak, handizkarien eta detailisten elkarteek, saltzaileek eta Portu Agintaritzak berak osasun teknikariek lagunduta, agindutako neurriak hartu dituzte, erakunde eskudunek sortuta protokoloak betetzeko.
Desinfekzio eta garbiketa lanak indartzeaz gain, langileen arteko gutxieneko tartea errespetatzeko bitartekoak jarri ditu, betiere PPAk esandakoaren arabera. Segurtasun neurri horiek bermatze aldera, Guardia Zibila eta Ertzaintzaren “babesa eta laguntza” jaso dute.
Pasaiako portuak 2000 maskara jaso ditu Estatuko Portuetatik eta dagoeneko 900 banatu dira langile sektore ezberdinen artean. Maskara gehiago bidean daudela gaineratu dute PPAko iturriek, eta eskertu Estatuko Portuek eskainitako laguntza baita portuko erabiltzaile eta lankide guztiek egindako ekarpena ere.
