Don Boscon egindako maskarekin babestuta
Don Bosco Lanbide Heziketako Institutuak egin dituen 100 maskara jaso dituzte Errenteria-Oreretako merkatariek. Beste hainbeste eskatu dizkiote, eta iritsi zain dira.
Don Bosco Lanbide Heziketako Institutuan maskarak egiten ari dira koronabirusak eragin duen osasun larrialdiari aurre egiteko. Jo eta su ari dira, Oarsoaldean beharra duten pertsonei helarazteko. Eskaerak web orrialdearen bidez egin behar dituzte interesdunek. Maskara horiek jaso dituztenen artean daude Errenteria-Oreretako merkatariak; beraiek ere oinarrizko zerbitzua eskaintzen ari dira eta orain babestuago egiten dute lan.
Errenkoaldeko Izaskun Calvok aipatu duenaren arabera, herriko merkatariekin oroitu ziren Don Bosco Institutuan maskarak egiten ari direnak, eta behar ote zituzten galdetu zieten, “Errenkoaldera deitu zuten horretarako, igandean izan zen. Astelehenean bertan zabaldu genien aukera merkatariei, elkarteko bazkide izan edo ez, eta jende mordoak eskatu zituen”. 100 maskara eskatu eta asteartean bertan jaso zituzten maskara horiek eta merkatarien artean banatu Errenkoaldeko kideek.
Orain beste hainbeste eskatu dituzte, “bigarren eskaera hori noiz iritsiko den ez dakigu, lanean ari dira etengabe eta jakin badakit Pasaiako merkatariek ere egin dietela eskaera. Lehenengo eskaera azkar jaso genuen eginak zituztelako. Beraiek kontatu digutenez, duten makina azkarrenak ordu eta erdi behar du arkua egiteko, eta besteak motelago doaz, hiru ordu edo behar dituzte, bikoitza. Erotzeko moduko eskaera zerrenda daukate”.
Eskertuta daude merkatariak, hala esan du Errenkoaldeko kideak, “keinu ikaragarria izan da eta oso eskertuta daude. Lanean ari dira egunero, eta maskarekin babestuago egongo dira koronabirusaren aurrean; beraientzat hori oso garrantzitsua da”. Esker ona adierazteko, argazkia atera zuten, maskarak soinean eta lanean diren bitartean hainbat merkatarik.
