Fanderia, Lartzabal, Gabierrota eta Galtzarabordan, poltsa konpostagarriak etxeraino
Aldez aurretik eskatu beharko dute lau auzo horietako bizilagunek zerbitzua udalera deituta.
Poltsa konpostagarriak banatzeko zazpigarren makina jarri du udalak, Fanderian. Koronabirusak eragindako osasun larrialdia eta konfinamenduarekin, zenbait udal instalaziok ateak itxi egin dituzte. Horien artean, Fanderia eta Galtzarabordako kiroldegiak daude, eta bertan zeuden poltsa konpostagarrien makinetara sarbiderik ez dute auzotarrek.
Horren aurrean, udalak berak eramango dizkie beharrezkoa duten lau auzo horietako herritarrei poltsa konpostagarriak etxeraino. Aldez aurretik, 943 449 607 telefono zenbakira deitu behar dute 09:00etatik 14:00etara astelehenetik ostiralera. Deitzeko unean etxebizitza erabiltzailearen eta hondakinetako txartelaren datuak eskatuko dira —edukiontziak irekitzeko txartelean bertan daude idatziak—.
Poltsa konpostagarrien sorta bakoitzak hamar asterako iraupena duela gogorarazi du udalak bide batez. Gainontzeko herritarrek, udaletxean, Beraunen, Iztietan, Agustinetan eta Kaputxinoetan dituztela eskura poltsa konpostagarriak banatzeko makinak esan du. Udala, astelehenean (hilak 6) hasiko da premiazko zerbitzu hori eskaintzen.
