Kafetxo birtual baten inguruan elkartuko dira mintzalagunak
Modu telematikoan bada ere, Mintzalaguna egitasmoaren ohiko saioetan parte hartzeko aukera bermatuko du Lau Haizetara Euskaltzaleon Topaguneak.
Mintzalaguna egitasmoko hainba kideren artxibo irudia. Dagoeneko hiru aste dira koronabirusak gizartea eten zuela eta horiekin batera, egitasmo herrikoi guztiak, besteak beste, Mintzalagun saioak. Errenteria-Oreretako Lau Haizetara Euskatzaleon Topagunean kezkatuta daude, denbora aurrera doalako “parentesi hau noiz hasi den badakigu, ez ordea noiz bukatuko den. Ez zaigu egokia iruditzen Mintzalaguna egitasmoa hain beste denboraz geldituta egotea, euskararen erabileran sakontzeko bide nagusia baita jende askorentzat”, adierazi du Xixilio Maritxalar Mintzalaguntzaileak.
Hori dela eta, Lau Haizetaran salbuespezko egoerari salbuespenezko irtenbidea emango dio. Mintzalagunak jarraipena izango du, modu telematikoan, hainbat lagun bildu ditzakeen Zoom plataforma digitala erabiliz. Kafetxo baten inguruan egin ohi zutena, orain kameraren aurrean egin beharko dute norberaren etxean egindako kafearekin. Dena dela, muina berbera izaten jarraituko du, hainbat mintzalagun eta mintzalaguntzaile bat, giro lasaiean, gai ezberdinei buruz hitz egiten eta beti euskaraz.
Mintzalagun egitasmoko 18 taldeetatik 11 taldek parte hartuko dute bilkura telematikoetan, “50 bat lagun” Maritxalarren arabera. Kamera baten aurrean egiteak ez du xarma berdina, baina Lau Haizetara egoera berrira egokitzeko duen prestutasuna nabarmendu du mintzalaguntzaileak, “gauzak hobeto ala okerro egin ditzakegu, baina ezin da esan ez garela mugitzen”. Etxean mugagabe gelditu behar izatea gogorra da, baina ez da oztopo euskararen alde egiteko.
Gaur gaurkoz, lehentasun nagusia osasun publikoa da. Baina Topagunean argi dute aldi baterako afera baino ez dela, eta une batean ala bestean Mintzalaguna itzuliko dela. Taldeak osatuta egon arren izena emateko epeak zabalik izango da, uneoro. Informazio gehiagorako, deitu 943340143 telefono zenbakira.
