[Galeria] Zorionak!
700 muxu eta besarkada emango dizkiote Errenteria-Oreretari gaur bertako bizilagunek, bat bete duen urte bakoitzeko.
700 muxu eta besarkada emango dizkiote Errenteria-Oreretari gaur bertako bizilagunek, bat bete duen urte bakoitzeko. Gaur bete ditu 700 urte hiribildu eratu zenetik. Ezingo du kalean ospatu, handiki, halabeharrez; Covid-19ak eragindako osasun larrialdiak eta konfinamenduak ez duelako horretarako aukerarik eskainiko, baina ospatu, ospatuko dute. Aste honetan zehar, hamarnaka dira udalaren deialdiari segika balkoi eta leihoak Errenteriaren koloreaz, urdinez, puxikez, zorion txartelez bete dituzten herritarrak.
Zoriondu beharra dago, 700 urte ez direlako egunero betetzen, ez gainera hain osasuntsu, hain dotore, hain zintzo eta hain eskuzabal eta solidario. Hamaika dohain ditu herriak, eta hura egunero egiten duten herritarrek; solidario dira, ekintzaile, sortzaile, festazale, feminista, artista, langile, borrokalari, irrizale… baina batez ere herri. Horiek guztiak, egunero erakusten dituzte, eta are gehiago ari dira agerian uzten Covid-19aren eraginez ezarritako alerta egoera eta konfinamenduarekin. Solidarioa, anitza, eskuzabala eta pertsonak eta haien zaintza erdigunean jartzen duen herria.
Kalearen faltan, balkoi eta leihoak bilakatuko dituzte plaza, Plaza Etxean iniziatibarekin. Lehen hitzordua, 12:00etan dute, EMKEren Musika Bandak, herriaren ikur den Zentenarioaren bertsio berezia prestatu du eta denak abestu eta dantzatzera deitu. Herri Biziaren webgunean jarraitu daiteke. Bigarren hitzordua, 19:00etan izango da, artista eta sortzaileen herria izanik, ikuskizuna eskainiko diote Errenteria-Oreretari Jon Maya dantzariak eta herriko hainbat artistek. Ondoren, berriz ere, Zentenarioa leiho eta balkoietan. Ederra izango da; ez da zalantzarik. Hori ere Herri Biziaren webgunetik jarraituko dute herritarrek.
Zorionak Errenteria, eta zorionak bizia ematen diozuen, kolorez eta nortasunaz betetzen duzuen herritarrei; badituzue harro egoteko arrazoiak!
Nahi izanez gero helbide honetara bidal ditzakezue gaur egindako bideo eta argazkiak HITZA-k bihar galeria egin dezan.
Ondoko argazkiak, hainbat herritarrek sare sozialetan zabaldutakoak dira.