1936ko Gerrak suntsitutako errepublika gogoan
79 urte bete dira gaur Espainiako Bigarren Errepublika aldarrikatu zenetik. Errenteria-Oreretako hainbat txokotan bandera jarri dute.
Gaur bete dira 89 urte Espainiako Bigarren Errepublika aldarrikatu zenetik. Apirilaren 14arekin egin ohi den bezala, Pikoketa Oarsoaldeko elkarte errepublikazaleak hiru koloredun bandera balkoietan jartzera deitu du. Errenteria-Oreretako udaletxean ere jarri dute errepublikaren bandera, udal talde guztiek hala adostuta.
Larrialdi egoerak hala behartuta, ezin izan dute kalean ekitaldirik egin, baina Pikoketa ziur da egoera normaltzean indarrarekin bueltatuko direla. Aurten Paco Jover Pascual omendu nahi dute, 98 urte dituen errepublikazale errenteriarra. Gainera, 13:00etan Riegoren ereserkia balkoietatik entzunarazteko deia ere egin dute.
Bestalde, Pikoketak nabarmendu du larrialdi egoeran askatasun, berdintasun eta senidetasunaren baloreak gailentzen ari direla. Hori bai, Felipe VI.a Espainiako erregearen “onura sozial eza” salatu nahi izan dute.
“Koroan onura gutxi ikusiko dute ospitaleratuta daudenek, etorkizun profesionala arriskuan ikusten dutenek, etxerik gabe gelditzeko arriskua pairatzen dutenek edo bere dendako pertsiana berriro irekiko duten ala ez ez dakitenek”.
