COVID-19aren aurkako protokoloa martxan jarri da portuan garraiolari bat hil ondoren
Pasaiako Portu Agintaritzak jakinarazi duenez, garraiolari britainiar bat zendu da gaur, lanean ari zela. Bihotzekoak jota hil dela uste duten arren, COVID-19aren aurkako ezarri dute, gizonak sukarra baitzuen.
Garraiolaria portuan bertan hil da gaur. Erresuma Batuko garraiolari bat zendu da gaur Pasaiako portuan. Portu agintaritzako iturriek azaldu dutenez, ezbeharra goizeko 9:30ean eman da. Portuko zaindariek lurrera erori den gizon baten berri izan dute eta bertaratzerakoan, gizonak besoko mina zuela jakin dute. Harekin zirela, gizonak bihotz-biriken gelditzea pairatu du. Anbulantzia arrunt bat eta beste medikalizatu bat iritsi dira eta desfibriladorearekin ere ahalegindu dira gizona erreanimatzen. Ez dute lortu ordea eta gizona bertan hil da.
PPAko iturriek lehen unetik protokolo guztiak aktibatu dituztela nabarmendu dute. Hilberriak sukarra zuenez, COVID-19 birusaren aurkako protokoloarekin aurrera egitea erabaki dute. Hortaz, garraiolariarekin zuzeneko harremana izan duten langile guztiak, protokolo horren baitan artatuko dituzte.
Bestalde, zaintza zein osasun zerbitzuetako kide guztiek, norbera babesteko ekipamenduak uneoro soinean eraman dituztela esan dute PPAko iturriek. Era berean ezbeharra gertatu den zonalde osoa ozonoarekin desinfektatu dute, protokoloak agindu bezala.
