Indarkeria matxistari aurre egiteko sarea ehundu nahi dute Oiartzunen
Oiartzungo Udalaren Feminismo Sailak kanpaina bat martxan jarri du, bizilagunen artean elkartasuna sustatzeko. Atarietan kartela jartzeko eskatu dute.
Kartela.
Oiartzungo Udaleko Feminismo Sailak indarkeria matxistaren kontrako kanpaina bat abiarazi du. Helburua da indarkeria mota hori pairatzen duten emakumeak laguntzea. Gaiari buruz kontzientziatzeko kartelak jarri dituzte irekita jarraitzen duten hainbat establezimendutan, baita atari batzuetan ere.
Hala ere, oiartzuarrei laguntza eskatu diete, udalak ahal izan den moduan zabaldu baititu kartelak. Kartelak norberaren etxeko atarian jartzeko eskatu diete. Komertzioetan har daitezke kartel horiek, edo, bestela, bakoitzaren etxean inprimatzeko aukera badago. Bigarren hautuaren alde eginez gero, kartela Feminismo Sailari eskatu beharko zaio, e-posta bidez.
Mezu hau dauka kartelak: Eraikin honetan indarkeria matxistarik onartzen ez dugun bizilagun asko bizi gara. Laguntza behar baduzu eska iezaguzu. Indarkeria matxistari aurre egiten dioten emakumeen arreta ematen dion zerbitzuaren telefono zenbakia ere agertzen da: 900 840 111.
