Udaltzainek maskarak banatu dituzte garraio publikoan
EuskoTrenen Arraguako geltokian, Ekialdebuseko autobusetan eta Xorrolan banatu dituzte erabilera bateko maskarak, lanera joan behar dutenen artean.
Maskarak garraio publikoan banatzen hasi dira. Oiartzungo Udalak maskarak banatu ditu gaur goizean, lanera joan diren oiartzuarren artean. Udaltzainak izan dira banaketa egiteko ardura hartu dutenak. EuskoTrenek Arragua auzoan duen geltokian zein Ekialdebusen autobusetan eta Xorrolan banatu dituzte maskarak, gaur zein atzo.
Espainiako Gobernuak agindu zuenez, asteartetik aurrera maskarak banatu behar ziren. Banaketa non, nola eta nork egin behar zuen ere zehaztu zuen.
Udalak azaldu duenez, Oiartzun ez zegoen banaketa-herrien artean. Udalak, hala ere, bere esku dituen baliabideekin, garraio publikoko erabiltzaileen osasuna eta segurtasuna bermatzeko bere gain hartu du egiteko hau.
