Jesus Mari Martiarena: "Herritarren ongizatea eta bizi kalitatea gure lehentasuna dira"
Jesus Mari Martiarena alkateak koronabirusari aurre egiteko abian jarri diren neurrien berri eman du. Herritarren ongizatea lehentasuna da udalarentzat.
Jesus Mari Martiarena. Jesus Mari Martiarena Lezoko alkatearen arabera, “herritarren ongizatea eta bizi kalitatea” dira Lezoko Udalaren lehentasuna koronabirusak eragindako krisialdi aro honetan. Lezoko Udala krisiak eragindako ondorioak “minimizatzeko” etenik gabeko lanean ari dela adierazi du,”beharra duten herritarrei, pertsona, familia, autonomo edota enpresei eskura dauden laguntzen inguruko informazioa ematen”, eta aldi berean, Gizarte Sailetik laguntza horien eskaerak zuzenean kudeatzen.
Ildo horretan, hedabideetara bidalitako oharrean jakinarazi du Eusko Jaurlaritzak, Gipuzkoako Foru Aldundiak eta garapen agentzia nahiz udalek hainbat programa, neurri eta diru laguntza lerro aktibatu dituztela osasun krisiaren ondorioak jasaten ari direnei laguntzeko. Udalari dagokionez, besteren artean, udal zerga eta tasen ordainketak atzeratu egin dituzte. “Horrez gain, lezoarren presio fiskala baretze aldera, beste hainbat neurri berri hartzea aztertzen ari gara”, gehitu du alkateak.
Martiarenak nabarmendu du Lezoko kaleetan hainbat desinfekzio eta garbiketa lan berezi egiten ari direla koronabirusa dela eta: “Maiztasunez egiten dira garbiketa horiek, koronabirusak eragindako arazoak saihesteko”.
Lezoarrek arazoren bat badute, edo laguntza behar badute, 943 52 46 50 telefono zenbakira dei daitekeela zehaztu du alkateak.
