250.000 euro bideratu nahi ditu EH Bilduk COVID-19aren ondorioei aurre egiteko
Koronabirusaren ondorioz egoera zaurgarrian direnentzako diru-laguntza sorta proposatu du koalizioak baina ez du udal taldearen erantzunik jaso. 150.000 herritarren beharrak asetzeko izango lirateke eta 100.000 merkatari eta ostalarientzat.
Udalaren erantzunik jaso ez duenez, Lezoko EH Bilduk publikoki zabaldu du bere proposamena. Koronabirusaren ondorioz, egoera zaurgarrian diren herritar eta merkatarientzako 250.000 euroko diru-laguntzak ematea proposatu du Lezoko EH Bilduk. Koalizio abertzaleak adierazitakoaren arabera, udal taldeak ez die erantzunik eman haiek egindako azken proposamen sortari. Hori dela eta, “proposamen propioa” egitea erabaki dute.
COVID-19ak eta hari lotutako larrialdi sanitarioak, herritar asko gogor jo dituela gogorarazi du EH Bilduk. Aldi Baterako Lan Erregulazio Espedienteak asko egin dira asteotan eta beste asko zuzenean langabezian gelditu dira. Errealitate honen aurrean, merkatari txikiak, ostalariak eta autonomoak, kaltetuenen artean.
Egoeraren larrialdiaz jakitun izanda, zuhurtziaz jokatu behar dela diote EH Bildun, “egoera honetan lasaitasunez jokatu behar da, baina hori ez dago lehenbailehen hartu beharreko erabakiekin kontraesanean”. Larritasunaren eredu gisa, Lezoko Udalak Gizarte Larrialdi Laguntzak aipatu ditu koalizioak, “urte osorako udalak aurreikusia zuen diru kopuru osoaren %75 baino gehiago erabili behar izan da lehen lau hilabeteetan.
Hortaz, Lezoko EH Bilduk honakoa proposamena egin dio udalari publikoki. 150.000 euro, norbanako eta familien oinarrizko beharretara bideratzea. Alokairu eta maileguak ordaintzeko, elikagaiak erosteko, botikak eta farmazietako produktuak erosteko eta argindarra, gasa, ura eta bestelakoak finantzatzeko izango litzateke diru hori. Gainontzeko 100.000 euroak, herriko merkatari txikiei eta ostalariei laguntzeko bideratuko lituzkete.
Lezoko Udalari proposamen berbera egin zionetik “10 egun baina gehiago” igaro direla jakinarazi dute. Haien iritziz, herritarren gehiengoari kalte egingo dion arazo baten aurrean, elkarlana beharrezkoa izango da “gure ustez hartu beharreko erabakiak guztion artean adostea litzateke egokiena”, diote EH Bilduko iturriek.
