Irakurleen irudiekin osatutako collage bat egingo dute Pasaiako liburutegiek
Pasaitarrak argazkiak bidaltzera deitu dituzte liburutegiek. Jasotako irudi guztiekin collage bat egingo dute, hilaren 23rako, Liburuaren Nazioarteko Egunerako alegia.
Hauxe da liburutegiek proposatu duten argazki eredua. Irudia: Urko Imaz. Pasaiako liburutegiek egitasmo polita jarri dute martxan Liburuaren Nazioarteko Egunerako. Herritarrak argazkiak bidaltzera deitu dituzte, jasotako irudi guztiekin collage kolektibo bat sortzeko. Funtsean, liburu bat eta irakurlea agertu beharko dute argazkian, ala hobe esanda, irakurlearen oinak. Horixe da eskatutakoa (ikusi argazkia), gustuko duten ala gomendatu nahi duten liburu bat oinen inguruan kokatzea, eta argazkia egitea. Irudiak posta elektronikoz bidali beharko dira.
Apirilaren 23an ospatzen da Liburuaren Nazioarteko Eguna, hiru idazle handiren heriotzaren datari jarraiki. 1616ko apirilaren 23an hil ziren William Shakespeare eta Inca Garcilaso de la Vega. Egun bat lehenago hil zen Miguel Cervantes, baina 23an lurperatu omen zuten. Idazle hauek izan zuten garrantzia dela eta erabaki zuen UNESCOk 1995ean apirilaren 23a, Liburuaren Nazioarteko Eguna izatea.
Katalunian ordea, eskarmentu handiagoa dute, Liburuaren Nazioarteko Egunak Sant Jordi egunarekin bat egiten baitu. 1930tik arrosak eta liburuak trukatzen dituzte bertan.
