Antxotarrak eta lezoarrak nor baino nor
Ahalik eta pertsona gehien jarri behar dituzte dantzan Modus Operandi talde gasteiztarraren 'This is the fiesta' kantuarekin. Dantzan herritar gehien batzen dituen herria izango da erronkaren irabazlea.
Modus operandi taldearen This is the fiesta kantarekin egin behar dute bideoa. Egoera berezi ugari uzten ari da COVID-19ak eragindako alarma egoera. Etxealdiak zerbaitetarako eman badu, adimena zorrozteko izan den zalantzarik ez da, behintzat. Horren adibide, Lezo eta Antxo aurrez aurre jarri dituen erronka: ahalik eta pertsona gehien jarri behar dituzte dantzan Modus Operandi talde gasteiztarraren This is the fiesta kantuarekin. Dantzan herritar gehien batzen dituen herria izango da erronkaren irabazlea —hori bai, dantza bakoitzak bere etxean egin behar du, konfinamendua zorrotz jarraituta—. Saririk ez, baina jokoan da ohorea, eta gogor saiatuko direla agindu dute batzuek zein besteek.
Lezok jo zion erronka Antxori, eta Antxok gogotik hartu du. Parte hartzera deitu dituzte herritarrak, guzti guztiak, eta etxealdian elkarrekin direnak batera azaltzera dantzan, txoroarena egiten edota mezuak zabaltzen eta bost segundoko bideoa grabatzera This is the fiestaren doinua oinarri. Antxotarrek urrats bat harago egin, eta jantzi txuri gorriekin azaltzea gomendatu dute, girotzeko edo. Ondo dantzatu edo ez berdin dela esan dute antolatzaileek, “jendea, ahalik eta gehien biltzea hori da gakoa. Aiton-amonak,izeba-osabak,anai-arrebak,gurasoak,seme-alabak… denak dantzan jartzea”.
Bideo horiek lezoarren kasuan, 628 403 661 telefono zenbakira bidali behar dituzte. Antxotarrek, berriz, Topagunearen posta elektronikora bidali beharko dituzte. Hilaren 26a da bideoak bidaltzeko azken eguna.
Jasotako horiek guztiekin bideo zoragarri bakarra osatzeko bizpahiru egun izango ditu herri bakoitzak eta hurrengo asteazkenean (hilak 29) zabalduko dituzte sare sozialen bidez. Piztu Lezo dinamikak berrogeialdian martxan jarri duen webgunearen bidez ere zabalduko du.
