Haurrentzako ipuin kapsulak eskainiko ditu Andreone liburutegiak ostiralero
Konfinamenduak iraun bitartean haurrek liburuez goza dezaten, Lur Kortaren ipuin kontaketa saio bat igoko da astean behin, udal liburutegiko Youtube kontura eta udalaren webgunera.
Lur Korta ipuin kontalariak gidatuko ipuin kontaketak. Gaurtik aurrera martxan izango da Lezon ipuin kapsulak egitasmoa. Lur Korta ipuin kontalari eta aktoreak gidatutako ipuin kontaketa telematikoak izango dira. Etxean konfinatuta dauden bitartean haur eta gazteek liburuez gozatzeko aukera bermatu nahi dute Andreone udal liburutegiak eta Lezoko Udalak.
Ipuin kapsulak ostiralero igoko dira 16:00etan liburutegiaren Youtube kontura baita Lezoko Udalaren webgunera ere. Saioak astebetez izango dira ikusgai. Lur Kortak dagoeneko luzatu die haur guztiei ipuin kapsulekin bat egiteko gonbita. Ostiralero beraz, itxialdia zertxobait arindu ahalko dute etxeko txikienek Lur Kortaren eskutik; tarte batez, etxeko lau paretetatik irten ahalko dira, sormenaren bidez.
