Kirolari txikiak, artista bihurtuko dira
Marrazki eta logo lehiaketa antolatu du Eskola Kirolak. Artista bila dabil konfinamendu garaian, eta LH eta DBHko Oarsoaldeko ikasleak marrazten eta logoak sartzen jarriko ditu.
Eskola Kirola. Marrazki eta logo lehiaketa antolatu du Eskola Kirolak. Artista bila dabil konfinamendu garaian, eta LH eta DBHko Oarsoaldeko ikasleak marrazten eta logoak sartzen jarriko ditu. Lehen Hezkuntzako 1, 2 eta 3. Mailako ikasleek marrazkiak egin beharko dituzte eta Lehen Hezkuntzako 4, 5, eta 6. Mailakoak zein DBHko lau mailetako ikasleek, berriz, logoak. MArrazki zein logoekin Oarsoaldeko Eskola Kirola edo izen berritzaile bat erantsi beharko dute.
Kirolekin edo jarduera fisikoarekin lotutako artelanak nahi dituzte, eta margotze teknika eta tresnak askatasun osoz erabil daitezke horiek egiteko. Lehiaketan parte hartzeko epea zabalik da maiatzaren 3ra arte (hori barne), eta lanak sare sozialetara edota posta elektronikora bidal daitezke. Parte hartu ahal izateko, ezinbesteko baldintza da Oarsoaldeko ikastetxeren bateko ikasle izatea.
Marrazkia eta logoa A4 neurriko orri batean sartu behar dute JPG formatuan.
Saritutako lanak —adin tarte bakoitzeko bat— maiatzaren 11n argitaratuko dituzte sare sozialen bidez. Irabazleek berriz, marrazkia edo logoa duen kamiseta, Oarsoaldeko Eskola Kiroleko botilatxo bana, eta sari sorpresa jasoko dituzte. Irabazleak aukeratzeko, berriz, maiatzaren 4tik 6ra aditu talde batek egingo du finalisten hautaketa eta 7trik 10era, berriz, herri bozketa bidez egingo dute.
Sariak, konfinamendua amaitutakoan jasoko dituzte irabazleek euren ikastetxeetan adostutako egun eta orduan.
