Txotx!... Aurten balkoi eta leihoetatik
Ezinezkoa izango da aurten Sagardo Eguna ohiko moduan ospatzea, baina konfinamenduan bada ere, ospatu ospatuko dute. OGA Oreretako Gazte Asanbladaren ekimenez, iniziatiba jarri dute martxan eta datorren larunbatean (hilak 24) Zumardian sagardo egunak pizten duen giroa etxeko balkoi eta leihoetara eramatea proposatu diete herritarrei.
Irudi hau ez da errepikatu aurten, horren ordez, bañlkoi eta leihoetan ospatuko dute herritarrek sagardo eguna. Apirileko azken larunbateko hitzordu garrantzitsua da, erreferentea herritarrentzat, baita inguruko herrientzat ere eta jai giro ederrez betetzen du Errenteria-Oreretako erdialdea. Ezinezkoa izango da aurten Sagardo Eguna ohiko moduan ospatzea, baina konfinamenduan bada ere, ospatu ospatuko dute. OGA Oreretako Gazte Asanbladaren ekimenez, iniziatiba jarri dute martxan eta datorren larunbatean (hilak 24) Zumardian sagardo egunak pizten duen giroa etxeko balkoi eta leihoetara eramatea proposatu diete herritarrei.
Gazte asanbladako kidea da Ane Beltran eta iniziatibarekin herrian hain garrantzitsua den egunari aitortza eta keinu egin nahi diotela esan du, baina haragoko asmoa ere badute, “alarma eta konfinamendu egoera honetan, ezinbestekoa da herrikideak zaintzea eta gure herria, Orereta ere zaintzea. Bide horretatik ari gara hainbat ekintza antolatzen azken asteetan, jendeari konfinamenduan ongi pasatzeko, barre egiteko, gozatzeko aukera eskaintzeko”. Sagardo Eguna bertan behera geldituko zela jakin bezain pronto hasi ziren lanean, hausnartzen, egun hori modu alternatiboan, berritzailean, eta egungo baldintzetara egokitutakoa eskaintzeko herritarrei. Herriaren 700. urteurrenaren eguna ekarri du gogora —hilaren 5ean izan zen— “ospakizuna balkoi eta leihoetatik egin genuen eta polita izan zen; antzeko zer edozer egin nahi dugu larunbatean sagardo egunarekin”.
Sagardo Eguna ahal den moduan ospatu nahi duten horiek erraza dute lana: “Herritarrei balkoi eta leihoak sagardo eguneko zapiekin, sagarrekin, txapelekin eta kamiseta zuriekin atontzeko eskatu diegu. Zumardian jartzen diren sagardo postuetan sortzen den giroa balkoi eta leihoetara eraman nahi dugu, bederen. Etxetik ere ospatu dezakegu”.
Beste zerbait ere eskatu diete herritarrei #SagardoEgunaEtxean traola erabilita sare sozialetara igotzeko argazkiak edo bideoak: “Sagardo eguna ospatzen duten bitartean, sagardoa botatzen edo txistorra jaten… egunarekin lotutako zer edo zer erakusten duten argazkiak, alegia”.
Txotx egiteko ordu zehatzik ez dute jarri: “Egunean zehar bakoitzak nahi duen unean egin dezake, ez dugu hitzordu zehatz bat jarri.
Oreretako Gazte Asanbladak egun osoan deitu du girotzera balkoi eta leihoetatik herria, baina hitzordu zehatza egin duenik bada: Sindikato taberna. Sagardo egunerako DJ Bullekin emanaldia antolatua zuen eta sagardo eguna bertan behera geldituta, emanaldia egoerara moldatu eta online egingo du. Larunbatean 19:00etan izango da hori.
Ez da Oreretako Gazte Asanbaladak abiatu duen iniziatiba bakarra, gaztetxearen 20. urteurrenaren harira kamiseta lehiaketa martxan du, eta aste honetan bertan Egunean bost herriaren gaineko galdera sorta lehiaketa abiatu du, “iniziatiba txikiak egiten ari gara jendea entretenitzeko, herritarrak zaintzeko eta gure herria ere zaintzeko”.
