Adinekoen eskubideak errespetatzea eskatu du Duintasunak
Konfinamendua arintzeko jakinarazitako neurriekin, kezka azaldu du, Duintasuna elkarteak, "izan ere, aditzera eman digute adinekoak besteek baino luzaroago geratu beharko dugula etxean".
Duintasuna elkartearen protestetako baten artxiboko irudia. Adinekoen eskubideak errespetatzea, begirunez tratatzea eskatu du Duintasuna elkarteak, baita adinekoen elkarteen iritziak aintzat hartzeko. Konfinamendua hasi zenetik 40 egun bete direnean, gainontzeko herritarrek bezala, adinekoek ere, oro har, etxealdia arduraz betetzen ari direla esan du jubilatu eta pentsiodunen elkarteak, “herritar guztien osasuna babesteko”. Konfinamendua arintzeko jakinarazitako neurriekin, baina, kezka azaldu du, “izan ere, aditzera eman digute adinekoak besteek baino luzaroago geratu beharko dugula etxean”.
Adinak ez deula argudio arbitrarioa izan behar adinekoak konfinatzen jarraitzeko uste du Duintasunak, eta talde batzuen segurtasuna babes neurriekin bermatu behar dela erabakitzen bada, ez duela horrek adinaren araberakoa izan behar baizik eta osasun irizpideei jarraituta esan du: “Arrisku gaixotasunak, edota kutstazeko benetako arriskua ekar dezakeen kasuetan, zehazki”.
Sakrifizio handia egiten ari dela pentsiodunen kolektiboak gaineratu du elkarteak, “bai etxean, bai egoitzetan eta ospitaleetan, eta kutsadura iturri garela dioten zenbait diskurtsok etsipena eta beldurra sortzen dute”. Konfinamendu aurreko errutinak berreskuratzea ezinbestekoa da elkartearen hitzetan, adineko pertsonen osasuna zaindu eta “hondatze fisiko eta emozionala” saihesteko: “Ariketa fisikoa da adibide bat, are gehiago kontuan izanda adinean aurrera egin ahala zailagoa dela galdutako baldintza fisikoak berreskuratzea”.
Beste kezka iturri bat, bakarrik bizi diren adinekoengan isolamenduak izan ditzakeen ondorioak, “sintoma psikikoak eragiten ditu, antsietatea, larritasuna, depresio egoerak, desorientazioa”. Horiek horrela, lehenbailehen ateratzea, eta horretarako senideen zein beste batzuen laguntza jasotzea beharrezkoa dela dio Duintasunak.
Adinaren arabera ez diskriminatzea, gainontzeko herritarrekiko kontsiderazio bera izatea adinekoekiko, hori eskaera zehatza, “horretarako beharrezko baliabideak eskatzen ditugu, maskarak, eskularruak, testa… konfinamenduaren irteera segurua bermatzeko”. Horiek guztiak, gainera, doakoak izatea eskatu dute baliabide urriak dituzten pertsonentzat.
