Iztieta-Ondartxok, jaietako egun nagusia ospatuko du
Ohiko moduan ez, baina ospatu ospatuko dute Iztieta-Ondartxoko bizilagunek auzoko jaietako egun nagusia.
Ez da txupinazo jendetsurik izango, ezta herri bazkari edota kale beteko danborrada. Ez da jaietarako garai ona, ez orain arte ezagutu ditugun moduko jaientzat, behintzat, COVID-19ak hankaz gora jarri duelako guztia. Ohiko moduan ez, baina ospatu ospatuko dute Iztieta-Ondartxoko bizilagunek auzoko jaietako egun nagusia. Berrasmatu egin behar izan dute horretarako, aurretik beren herrian egindako beste ospakizunetan egin behar izan duten bezala: Errenteria-Oreretaren 700. urteurrena ospatzeko egin zuten , edo asteburu honetan Sagardo Eguna balkoi eta leihoetatik ospatzeko egin dute.
Horixe agertokia, balkoi eta leihoak. Txalotzeko, protestarako, elkartasunerako, kulturarako… bai, baita jaietarako ere. Maiatzaren Lehena, Langileen Nazioarteko Eguna du jaietako egun nagusia Iztieta-Ondartxok, eta egun horretan, etxealditik bada ere, gogotik ospatu nahi dute. Balkoi eta leihoak dotore apaintzera deitu du Gurekin auzo elkarteak, “zapi, eta txapelekin jantzi balkoiak eta leihoak”. Bi hitzordu ere jarri dituzte, hutsik ez egitekoak, danborrada 12:00etan eta zezen suzkoa 21:00etan. Danborradaren doinuak lau haizetara zabalduko dituzte eguerdian; 21:00etan berriz, zezen suzkoaren ohiko doinuekin girotuko dute auzoa amaiera emateko jai egunari. Horien artean, egun osoan zehar auzoa girotzera deitu ditu auzo elkarteak bizilagunak balkoi eta leihoetatik.
Ondoko bideoa, Iztieta-Ondartxoko Gurekin auzo elkarteak prestatu du.