Kultur Labearen eskaintza berria, gaurtik
Gaurtik hasi eta ostegunera arte programazio anitza eskainiko du Kultur Labea proiektuak. Yoni Camacho Sonakay taldeko abeslariak estreinatuko du astea bere emanaldiarekin, gaur.
Gaurtik hasi eta ostegunera arte programazio anitza eskainiko du Kultur Labea proiektuak. Yoni Camacho Sonaay taldeko abeslariak estreinatuko du astea bere emanaldiarekin, gaur. Bihar, berriz, Saioa Aizpurua ipuin kontalaria eta klownak hartuko du Herri Biziaren agertoki berri hori.
Roberto White titiriteroak ere bat egin du eskaintza kultural berritzailearekin, eta asteazkenean egingo du emanaldia. Asteko azkena, oraingoan ostegunean, ostiralean Maiatzaren Lehena izanik ez delako emanaldirik izango. AZken saio hori, Andoni Agirregomezkorta aktorearen emanaldiarekin osatu du proiektuak.
Emanaldi berrien estreinaldia, 18:00etan izango da. Hortik aurrera, nahieran ikusteko aukera izango da.
Kultur Labea proiektua orain hiru aste abiatu zuen Errenteriako Udalak. Kultur programazioa birplanteatzeko beharra ere ekarri du Covid-19ak, beste arloetan bezala, eta proiektuarekin leiho bat zabaldu nahi izan du udalak Errenteriako sortzaileak eta horien lanak ezagutzera emateko egoera honek jarraitzen duen bitartean. Herriko sorkuntzak etenik izan ez dezan pentsatutako gune bat da, finean.
Proiektuari esker, antzerkiak, dantzak, musikak eta adierazpen ezberdinetako emanaldiak euren ohiko agertokia aldatu eta Herri Bizia , udal komunikabidearen webgunean izango dute txoko bat. Bertan egingo den programazioa, udalak horretarako espresuki kontratatutako emanaldiekin osatuko da.