Urkabe Baitan-en zuzkidurazko etxeak egiteko hitzarmena onartu dute
Apirileko plenoan, zinegotzi batzuek etxetik konektatu behar izan dira. Lintziringo eremuan aparkalekuak egiteko lurra lagatu da.
Zazpi zinegotzik bakarrik hartu zuten parte, prebentzioagatik. Oiartzungo Udalbatzak plenoa egin zuen atzo arratsaldean, apirilari dagokiona. Ohiko plenoa, baina, ezohikoa izan zen. Zazpi zinegotzi (EH Bilduko bost eta EAJko bi) batzar aretoan izan ziren, quorum-a egon zedin. Gainontzekoek etxetik parte hartu behar izan zuten.
Lehen aldia izanik, arazo tekniko txiki batzuk egon ziren. Ezer larririk ez, hamar minutuko atzerapen txiki eduki baitzuen plenoak.
Gai zerrendan, Urkabe Baitan etxea. Bertan zuzkidurazko etxeak egingo dituzte, eta udalak Eusko Jaurlaritzaren hitzarmenaren aldaketak sartzea onartzea aztertu behar zuten.
Jexux Leonet alkateak azaldu zuenez, gustura daude hitzarmenarekin. Oiartzunen dauden behar sozialei irtenbidea ematen diela uste du. Horrez gain, plangintza urbanistikoa errespetatuz, Elizalde auzoaren eta Urkabe eremuaren arteko lotura txukuna egiteko aukera ematen duela esan zuen.
Rafael Bergaretxek EAJko eledunak abstentzioa iragarri zuen. Proiektu horren kontra zeudela azaldu du, nahiago baitzuten Urkabe-Baitan aisiarako eremu bat egin. Hala ere, argi utzi nahi izan zuen ez daudela zuzkidurazko etxebizitzak egitearen kontra; beste kokaleku bat nahiago zuten.
Lintzirin
Beste puntu batean, Lintziringo zerbitzu bidea eraiki ondoren soberan geratu diren lur eremuekin zer egin erabaki zuten. Lur horiek Leroy Merlin, Easo Motor eta Argitze Eder enpresei lagako die udalak, hogei urterako.
Enpresek lur horiek dohainik utzi zioten udalari, eta orain bueltan jasoko dituzte, baldin eta udalak ez duen eremuaren beharrizana. Doako aparkalekuak egiteko erabiliko dituzte.
Zinegotzi gehienak modu telematikoan aritu ziren.
