Landare libre nahi dute
Gaur bertan eta hilaren 10era bitartean iniziatiba abiatu dute Errenteria-Oreretako Landare elkarteari babesa emateko. Salaketarako modua ez da nolanahikoa; samurra izango da, maitasunez jositakoa.
Landare Herriarena kanpainaren kartela. Herriko tabernen aurkako epaia gauzatzen hasi zen Espainiako Auzitegi Nazionala joan den hilabete amaieran. Hala jakinarazi zuen Sortuk. Erabaki horrek eragina izango du Oarsoaldeko eta Bidasoko lau herriko tabernen gain: Errenteria-Oreretako Landare, Oiartzungo Girizia, Trintxerpeko Trintxer eta Irungo Hazian. Auzian sartutako herriko tabernen kontu korronteak enbargatzeko agindua eman du auzitegiak.
Euskal Herriaren eta ezker abertzalearen aurkako lapurreta erraldoia dela epai hori salatu du Sortuk. Baita, alarma egoerak ezarritako konfinamendu garaian bada ere, ez direla isilik geldituko, eta salaketa lau haizetara zabaltzeko prest daudela erakutsi du. Gaur bertan eta hilaren 10era bitartean iniziatiba abiatu dute Errenteria-Oreretako Landare elkarteari babesa emateko. Taberna eta elkartea izatetik harago doa, ez da elkargune gastronomiko hutsa; azken funtzio hori betetzen du, baina herriaren bizitza politikoari, sozialari, kirolari eta kulturari ere ekarpen itzela egin dio Landarek sortu zen urtetik beretik. 37 urte bete ditu Landarek aurten; urte horietan guztietan hamarnaka eta hamarnaka bazkideren lana, ilusioa, gogoa bildu ditu; herriari ekarpena egiteko hamaika iniziatiba kozinatu dira bertan.
Elkartea dago jokoan, haren desagertze fisikoa; herrian izan duen 37 urteko ibilbidearen ostean, ezereza, baina horrekin batera, hamaika ilusio, lagun ugariren lana eta esfortzua, hamaika iniziatiba daude jokoan, pareta horien artean azken urte luzeetan gordetako hamaika bizipen, une labur eta amaiezinak, konfidentziak, begiradak… irri ugari, eta noski, baita malkoak ere. Finean, herritar ugarirentzat esfortzu eta ahalegin handiarekin eraikitako erreferentzia espazioa, fisikotik harago doana, dago jokoan.
Salaketarako modua ez da nolanahikoa; samurra izango da, maitasunez jositakoa. Zer da zuretzat Landare? Hori bota duten galdera, nahi duen orok erantzun dezan; une bat izan daiteke, pentsamendu bat, usain bat, kolore bat, bizitza esperientzia bat edo hamaika, balio bat, irakaspena… Dena delako hori, postit batean idatzi eta Landare kanpoaldean kokatutako panelean itsasteko eskatu dute, baita prozesua bera ere grabatu eta helarazteko posta elektroniko bidez. Eraitsi nahi duten proiektuaren paretak esanahiz, sentsazioz, sentimenduz bete nahi dituzte, eta horretara deitu dituzte herritarrak, ahalik eta mezu gehien itsastera, alarma egoerak ezarritako babes eta higiene neurriak bazter utzi gabe; arduraz arituta.
Auzia ez dutela onartzen esan dute azkenik, “Landare herriarena da, ez da elkarte hutsa, Landarek herri bat egin du. Landarek Orereta egin du”.
