Pasaiatik irten gabe, oinez egin daitezkeen hainbat ibilbide
Herriaren izaera geografiko bereziak eta azalera mugatuak aukera gutxi ematen dizkie paseatzera ala kirola egitera irten nahi duten herritarrei. Udalak, baimendutako hainbat ibilbide proposatu ditu.
Molinaon ibiltzeko aukera izango da. Irudia: Pasaiako Udala.
Portua eta inguruko udalerrien artean itxita bizi dira pasaitarrak. Jardun ekonomikoa eta mugen afera direla medio, izaera geografiko berezia garatu du herriak. Horren ondorioz, azalera txikiko herria da Pasaia eta Mendiola eta Jaizkibelez gain, nekez topa daitezke herrian espazio ireki handiak.
Testuinguru honetan, aukera gutxi dituzte pasaitarrek, larunbatetik baimenduta dauden irteerak egiteko eta bereziki agindutako zehaztapenak betetzeko. Apirilaren 30eko SND/380/2020 aginduak egunean ordubetez paseoak eman eta kirola egiteko aukera ematen du. Pasaitarrek irteera horiek herritik irten gabe emateko, hainbat ibilbide jakin proposatu ditu Pasaiako Udalak.
Ziur asko antxotarrek dituzte zailtasun handienak. Mendebalde eta hego-mendebaldean Donostiara itsatsita dago. Hegoaldean eta ekialdean aldiz, Errenteria-Orereta ditu mugakide eta iparraldean sarrera debekatua duen portua. Mugez jakitun izanda, Molinao parkean barrena ibiltzeko aukera bermatua izango dute antxotarrek. Luzuriaga eremuarekin bat egiten Molinao eta Donostiako parte izan arren, Antxoko biztanleak joaten dira gehien bat. Antxotik Trintxerpera gainera, lasai asko joan ahalko da, bi barrutik lotzen dituen bidegorritik.
Pasai Donibaneko biztanleentzat herri osoa zeharkatuko duen ibilbide sinplea proposatu dute; Meipitik Alabortzaraino eta handik buelta, azken tartea portutik eginda. Hala ere, udalak argi utzi du, ibilbidea, oinezkoen kasua, barrutira baino ez dela mugatuko. Hortaz debekatua egongo da, Donibanetik Lezora doan bidea erabiltzea.
Donibaneko ibilbidea, herriaren mugen barruan egin beharko da ezinbestean. Irudia: Pasaiako Udala.
Sanpedrotarrek eta trintxerpatarrek ordea, ibilbide partekatua izango da. Ez dago puntetaraino joateko aukerarik, bertan izan ziren luiziak direla eta. Ordainean, mendira igo ahalko dute bi barrutietako biztanleak, Pasaiako Portu Agintaritzak Platako Farolaren ibilbidea erabiltzeko baimena eman baitu. Esan bezala gainera, arazorik gabe erabili ahalko da Trintxerpe eta Antxo lotzen dituen bidegorria.
PPAk Platako Farolaren bidea erabiltzeko baimena eman behar izan du, eremuak haienak dira eta. Irudia: Pasaiako Udala
Azkenik, txirrindularientzako ibilbide bat prestatzeaz ere arduratu da udala. Zentzuzko denez, txirrindulariena, ibilbide askoz ere luzeagoa izango da eta Jaizkibelen egingo da. Hona hemen salbuespena nagusia; Trintxerpe, San Pedro eta Antxoko txirrindulariek Lezo zeharkatu ahalko dute Jaizkibeleko errepidera iristeko, betiere herrian gelditu gabe. Informazio gehiagorako, sartu Pasaiako Udalaren webgunean.
Txirrindulariek Lezo zeharkatu ahalko dute, betiere bertan gelditu gabe. Irudia: Pasaiako Udala.
