[Galeria] Jende pilaketa handirik ez Eskalerillas inguruan
Asteburuan jende pilaketak eman ziren Pasaia zeharkatzen duten hainbat ibilbideetan. Azken egunetan behera egin du jende kopuruak, tartean, udaltzaingoak sarbideak kontrolatu dituelako.
Pasaiako udaltzainek Trintxerperako sarbideak kontrolatzen hasi dira, jende pilaketarik ez emateko. Sei aste baino gehiagoko itxialdia igarota, herritarrek plazer txiki bat berreskuratu zuten asteburuan. Larunbat goizetik, kalera atera daiteke, kirola egitera edota paseoak ematera eta argi dago jendea hankak luzatzeko gogoz zebilela tropelean atera baitziren Oarsoaldeko zenbait tokitan.
Pasaian adibidez jende pilaketak eman ziren Larunbat goizean, 70 urte baino gutxiagoko helduek atera ahal dutenean hain zuzen ere. Oleta-Eskalerillas pasealekuan eta San Pedroko puntetan besteak beste, zaila zen segurtasun tartea zaintzea uneoro, batez ere korrikalarientzat. Larunbat arratsaldean eta igandean egoera antzekoa izan zen.
Astelehenetik ordea, murriztu da gune hauetatik igarotzen diren pertsonen kopurua. Ziur asko astegunetako lan ordutegiek, lagundu dute jende kopurua mailakatzen. Dena dela, Udaltzainek Trintxerpeko sarbideak kotrolatu izanak ere asko lagundu du. 20:00etatik aurrera Trintxerpeko Correosen eta Oletako zeharbidean kokatzen dira eta Pasaian bizi ez direnei sarrera debekatuta dutela azaltzen diete, betiere, adeitasunez. Horri esker, San Pedrora doan jende kopuruak nabarmen egin du behera.
Hauek dira HITZAk Oleta inguruan lortutako irudiak.
