Leiho bat zabalik kirolarientzat
Kirola egiteko jarraibideak eman ditu horren harira Kirol sailak, eta horiek arduraz betetzeko eskatu.
Bizikletaren erabilera sustatzea da helburua. COVID-19ak eragindako alarma egoera dela eta, itxialdiaren arintzearen hasieran kirolariei, muga batzuekin, jarduten hasteko aukera eman diete. Kirola egiteko jarraibideak eman ditu horren harira Kirol sailak, eta horiek arduraz betetzeko eskatu.
Kirol ez profesionala kontakturik gabeko kirol jarduerara dago mugatuta: bizikletan ibili, korrika egin, patinatu, surfa egin… banaka eta babes egokiarekin egin behar da, gainera. Kirol profesionala eta federatuaren kasuan, banakako entrenamenduak, liga profesionaleko oinarrizko entrenamenduak, eta kontakturik gabeko kirol jarduera daude baimenduta. Kirolari profesionalek eta goi mailakoek banaka egin ahal izango dituzte entrenamenduak, aire zabalean, kirolaria bizi den probintziaren mugen barruan. Horretarako, behar izanez gero, naturagunetara sartu ahal izango dira, itsasora, ibaietara edo urtegietara, besteak beste.
Beharrezko kirol tresnak eta ekipamendua erabili ahal izango dituzte, hori bai, urruntze sozialerako eta higienerako neurri egokiak hartzea ezinbestekoa dute.
Kirol egokitu edo paralinpiko modalitateak egiten dituztenen kasuan, beste kirolari baten laguntza eduki ahal izango dute beharrezkoa bada. Kasu horretan, pertsonen arteko distantziak murriztu egingo dira kirola egiteko behar adina, eta biek maskara erabili beharko dute eta higiene pertsonala eta arnas etiketa bermatzeko neurriak ezarri.
Entrenamendu ordutegia eta iraupena kirol forma behar bezala mantentzeko beharrezkoak direnak izango dira, eta entrenatzaile lanak egiten dituen pertsonak ikusi ahal izango ditu, higiene eta prebentzio neurriak hartuta. Oro har pertsonen arteko segurtasun distantzia bi metrokoa izango da, bizikletak, patinak edo antzekoak erabiltzen direnean izan ezik; kasu horietan 10 metrokoa izango da. Dagokien kirol federazioak akreditazioa emango die kirolariei, kirol lizentzia edo goi mailako kirolarien ziurtagiria nahikoa izango dira.
Aurreko atal horretatik kanpo gelditzen diren beste kirolari federatuek banakako entrenamenduak egin ahal izango dituzte, aire zabaleko guneetan, egunean bitan, 06:00etatik 10:00etara eta 20:00etatik 23:00etara, eta bizilekua duten udalerriko mugen barruan. Huen kasuan ere, behar izanez gero, naturagunetara sartu ahal izango dira, itsasora, ibaietara edo urtegietara, besteak beste. Egiten duten kirol modalitatean animaliek parte hartzen badute, praktika aire zabalean egin ahalko dute, banaka, animaliak dauden lekuan, aurez hitzordua eskatuta eta denbora tarte berean. Kasu honetan ez dago baimenik entrenatzailea egon dadin, ezta laguntzailerik ere, kirol egokituan izan ezik, eta kirol federazioaren akreditazioa izan beharko dute.
Liga profesionaletako kirolarien oinarrizko entrenamenduari dagokionean, kirol klubetan edo elkarte anonimoetan oinarrizko entrenamenduak egin ahalko dituzte, berariazko kirol modalitate bati zuzenduak, banaka, eta beharrezko prebentzio eta higiene neurriak hartuta. Oinarrizko entrenamendutzat hartuko da kirol klub edo sozietate anonimoek dituzten entrenamendu zentroetan egiten den banakako entrenamendua, kirol modalitate bakoitzaren premia berezietara egokitua. Urruntze sozialeko eta higiene neurriak zorrotz bete beharko dituzte. Dagokion liga profesionalak behar bezalako akreditazioa eman beharko die.
