Lezoarrak ez diren 100 lagun baino gehiago eten ditu udaltzaingoak Altamiran
Lezoko Udaltzaingoa herriko sarbideak kontrolatzen hasi da paseoak eta kirola, norberaren udalerritik irten gabe egin behar dela gogorarazteko.
Altamira biribilgunea kokatzen hasi Lezoko Udaltzaingo, herriko sarbideak kontrolatzeko “Lezoarrak ez diren 100 lagun baino gehiago” eten zituen Lezoko Udaltzaingoak atzo Altamirako biribilgunean, hala jakinarazi dio gaur Udaltzaingoak HITZAri. Lezokoak izan gabe, herria oinez ala kirola egiten zeharkatu nahi izateagatik buelta emateko eskatu zieten. Era berean, Lezotik beste udalerrietara joan nahi zuten lezoarrak ere gelditu zituzten. Dena dela, azalpenak baino ez zituzten eman udaltzainek eta ez zen isun bakar bat ere ez jarri.
Larunbatetik paseoak ematera eta kirola egitera atera daitezke helduak. Ateratzeko baldintzak, uneoro errespetatu behar direla nabarmendu du Udaltzaingoak. Irteera horiek 06:ooetatik 10:00etara eta 20:00etatik 23:00etara egingo dira eta norberaren udalerriaren mugen barruan egin beharko da ezinbestean. Hortaz, erabat debekatuta dago, adibidez, Errenteriatik Donibanera joatea, Lezo zeharkatuz.
Izan ere, asteburuan gehiegizko jende fluxua izan zen Donibanen eta ondorioz, Lezon, denak bertatik igaro baitziren. Baldintza horietan, zailtasunak ager daitezke ezarritako segurtasun neurriak betetzeko. Hori eragozteko asmoz, udaltzainak herriko sarbideak kontrolatzen hasi dira, “ahal den heinean” pilaketa horiek eragozteko.
Salbuespen bakarra, Pasaiako txirrindulariei dagokiona da. Antxo, Trintxerpe eta San Pedrotik datozen txirrindulariek, Lezo zeharkatu ahalko dute Jaizkibel mendira igotzeko, betiere Lezon gelditu gabe. Hala ere, neurriak txirrindulari aktiboei eragiten diela adierazi dute udaltzaingotik, “errepidean kirola egitera doazenak pasa daitezke Lezotik, inondik inora bizikletarekin paseo bat emateko”. Salbuespena beraz, txirrindulariei baino ez dago zuzendua. Antxoko biztanleak, adibidez, ezin dira oinez joan Donibanera eta alderantziz.
Gaizki ulerturik eman ez dadin, eta baimendutakoak hobeto ulertzeko, Eusko Jaurlaritzaren webgunean emandako argibideak jarraitzea gomendatu Lezoko Udalak.
