Musika, ilustrazioa eta balleta aste honetako Kultur Labean
Gaur bertan, 18:00etan Jurdana Otxoa musikariak eskainiko du emanaldia.
Lander Garrok atzo eskaini zuen emanaldia Kultur Lsbean. Bere lana ikus daiteke Herri Bizian. Argazkia: Eider Rodriguez. Kultur Labeak programazioa eskaintzen jarraitzen du. Aste honetan, Radio Rebelde taldearen emanaldia eta Lander Garro bideogile eta idazlearen dokumentalak izan dira lehen hitzorduak. Gaurtik ostiralera arte, berriz, musika, ilustrazioa eta balleta izango dira agertoki berezian.
Gaur bertan, 18:00etan Jurdana Otxoa musikariak eskainiko du emanaldia . Bihar, berriz Arrate Rodriguez artista eta ilustratzailearen txanda izango da; eta astea ixteko, Aitor Arrieta ballet dantzariak emanaldia eskainiko du.
Kultur programazioa birplanteatzeko beharra ere ekarri du Covid-19ak, beste arloetan bezala. Hori horrela, Kultur Labea proiektua abiatu zuen udalak, eta leiho bat zabaldu Errenteriako sortzaileak eta horien lanak ezagutzera emateko egoera honek jarraitzen duen bitartean. Herriko sorkuntzak etenik izan ez dezan pentsatutako gune bat da, finean.
Proiektuari esker, antzerkiak, dantzak, musikak eta adierazpen ezberdinetako emanaldiak euren ohiko agertokia aldatu eta Herri Bizia , udal komunikabidearen webgunean izango dute txoko bat. Bertan egingo den programazioa, udalak horretarako espresuki kontratatutako emanaldiekin osatuko da.
Astelehenetik ostiralera, 18:00etan artista errenteriar batek etxean grabatutako pieza bat eskaintzen du bertan. Estreinaldira heltzerik ez dutenek, gerora ere ikusi ahal dute orain arte Kultur Labetik pasatako artista guztien lana.
