Atxilotu bat Lezon, ustez 20 garaje eta trastelekutan lapurtzeagatik
Astearte goizaldean atxilotu zuen Ertzaintzak 33 urteko gizona, garaje batetik ateratzean. Ustezko lapurreta guztiak, alarma egoeran indarrean zela gertatu dira.
Ustezko 20 lapurreta egozten dizkio Ertzaintzak atxilotuari. Ertzaintzak 33 urteko gizon bat atxilotu zuen astearte goizaldean Lezon, ustez garaje batean lapurtzen ari zela. Poliziak gainera, ustezko beste 19 indarrezko lapurreta egotzi dizkio gizonari. Asteartean bertan, ustezko lapurraren garaje batean sartu ziren ertzainak eta bertan, haiek esandakoaren arabera, lapurretekin zerikusia zuten hainbat objektu topatu zituzten, tartean, apurtutako bederatzi sarraila.
Segurtasun saileko iturriek azaldu dutenez, asteartean 3:00ak aldera atxilotu zuten gizona. Karlos Saldise plaza eta Larrun kale inguruko garaje batean indarrez sartzen ikusi zuten gizona. Ateratzean gizona identifikatu eta atxilotu egin zuten. Berarekin linterna bat, bihurkin eta kuter zeramatzan, besteak beste. Gaur bertan eraman dute atxilotua epailearen aurrera.
Azken hilabetean, tankera bereko lapurreta ugari salatu dituzte Lezoko hainbat bizilagunek.
