Escape Rooma, Oreretako Gazte Asanbladaren proposamen berria
COVID-19ak eragindako osasun larrialdia hasi zenetik egin duten moduan, oraingoan ere herritarrak eta herria zaintzera datoz, eta horretarako aisialdia eta Oreretaren ezagutza sustatzeko proposamen berria landu dute.
Errenteria-Oreretaren hurrengo hamabost urteetako hiri antolamendua definituko du HAPOak. Proposamen berri batekin heldu da Oreretako Gazte Asanblada. COVID-19ak eragindako osasun larrialdia hasi zenetik egin duten moduan, oraingoan ere herritarrak eta herria zaintzera datoz, eta horretarako aisialdia eta Oreretaren ezagutza sustatzeko proposamen berria landu dute, baita Zabala-Enea Gaztetxearen 20. urteurrenarekin lotu ere.
Oraingoan escape rooma prestatu dute adin guztietako herritarrei begirakoa; hori bai, zailtasun handikoa dela esan dute eta taldean jardutea aholkatu, segurtasun, babes eta higiene neurriak bermatuta “lagunekin edo gurasoekin. Bideo dei bidez egitea erabakiz gero, norberak bere ordenagailuan ireki beharko du jolasa”. Testuinguru jakin batean kokatzen diren jokoak dira escape roomak, eta jokalariek, hainbat proba, asmakizun eta erronka gainditu behar dituzte hasieran ezarritako helburua lortzeko. Denbora jakinik ez dago gazte asanbladak proposatu duen escape romma egiteko, beraz, nahi beste denbora erabili ahalko dute parte hartzaileek. Gainera, akatsak ere ez dira zenbatuko, eta ahal beste aldiz saiatu ahal izango dira.
Jokoan parte hartzeko, interneterako sarbidea duen ordenagailua; oharrak hartzeko papera eta boligrafoa; eta zip motako artxiboak deskonprimitzeko programa behar dira. Prozesuan zehar frogaren batekin trabatu eta aurrera egin ezinik gelditzen diren parte hartzaileek, pistak atalera jotzeko aukera izango dute. Hala ere, aukera hori ahalik eta gutxien erabiltzea gomendatu dute, “jokoa dibertigarriagoa eta luzeagoa izan dadin”. Jarraibide guztiak jokorako estekan kontsulta daitezke.
Jokoa amaitutakoan amaierako argazkia sare sozialetara igotzeko eskatu dute antolatzaileek, “lortu duzuela erakusteko, jende gutxik lortu baitezake. Ausartuko al zara?”.
