Edurne Saizarrek 'Etxean' sortako azkeneko kontzertua emango du
17:00etan emango du konfinamenduko azkeneko kontzertua, Youtubeko bere kanalean. Zazpigarren horrekin itxiko du sorta pianista oiartzuarrak.
Edurne Saizar.
Zazpi nota ditu musika eskalak, eta Edurne Saizarrek zazpi kontzertu emango ditu etxetik. Ostirala arratsaldero, konfinamenduak iraun artean, kontzertua eman du pianista oiartzuarrak.
Saizarrek deseskalada fasearekin bat egin, eta azkeneko notak joko ditu… Etxean sortari dagokionez, behintzat. Youtuben duen kanalean ikusi ahal izango da, 17:00etatik aurrera. Aurreko kontzertuak ere hor ikus daitezke.
Ez da arratsaldeko kontzertu bakarra izango. June Galardik, 19:00etan, beste kontzertu bat emango du, eta kanal honetan ikusteko aukera egongo da. Oiartzun Aurrea dinamikak antolatu du.
Bi emanaldien arteko tarte horretan, Abaraxka Telebistaren saio berri bat —bigarrena— eskainiko dute. 18:00etan izango da. Haurrek goizean protagonismoa izan dute Oiartzun Irratian.
