Lartzabal etxadiko jolas parkea berritzen ari dira
Arraguako jolas parkea berritzen ari da Oiartzungo Udala. Jolas berri pare bat jarri dituzte bertan, lurra berritzeaz gain. Datorren astean bukatuko dute.
Konfinamendua bukatzean, jolas berriekin ibiltzeko aukera izango dute haurrek.
COVID-19ak sortutako konfinamendu egoeran, jolas parkeak ezin dira erabili. Arragua auzoko Lartzabal etxadiko jolas parkean, baina, jarduera ematen ari da egun hauetan.
Oiartzungo Udalak jakinarazi duenez, eremua berritzen ari dira. Orain arte zegoen zorua kendu eta berria jartzen ari dira. Jolas berri bat ere jarri dute: sareekin egindako piramide bat. Horrez gain, haur handientzako egokitutako balantzin bat jarri dute.
Aurreikuspenen arabera, Arraguako jolas parkea berritzeko lanak datorren astearen bukaeran amaituko dira.
