Ondartxo pasealekua ireki ahal izateko, segurtasun bermeak nahi ditu Portu Agintaritzak
Pasaiako Portu Agintaritza ,Pasaiako Udalari zuzendu zaio, Ondartxo inguruan gertatu diren luiziak direla eta. Mendi magalaren jabeekin harremanetan jartzea eskatu diote udalari.
Ondartxo pasealekuko artxibo irudia. Martxo hasieratik sarbidea itxia dago, luizi batzuen ondorioz. Pasaiako Portu Agintaritzak ez du Ondartxo pasealekua irekiko, segurtasun berme guztiak bete arte. Gaur zabaldutako ohar publikoan PPAk urratsak ematea eskatu dio Pasaiako Udalari. Martxo hasieratik ixita dago San Pedroko pasealekua (arraun klubetik aurrera), luizi batzuen ondorioz. Ordutik itxita dago behin behinean sarbidea, oinezkoen segurtasun ez baitago ziurtatuta.
Ondartxoko pasealekua, PPAren menpe dago eta haiei dagokie oinezkoen ongizatea bermatzea, “Portu Agintaritzari dagokio bertatik paseatzen ari den jendeari gerta dakiokeenaren erantzukizuna”. Mendi magala ordea, ez da portuaren eskumena. Pasaiako Udalari magaleko jabeekin harremanetan jartzea proposatu diote, neurriak har ditzaten, “neurri horiek hasteko, mendi magalaren azterketa integrala egin behar dute”. Ikerketa geologikoak eta behar izanez gero, magalaren egonkortze lanak izango lirateke hartu beharreko neurri horiek.
Udalak orain arte emandako “urratsak” errekonozitu ditu PPAk, baina ekintza zehatzagoak nahi dituzte, “emaitzek bakarrik ahalbidetuko dute, oinezkoei berriro bidea irekitzea”. Elkarlanerako borondatea erakutsita, pasealekua “ahalik eta lasterren” irekitzeko nahia agertu du portuak, betiere oinezko segurtasuna bermatzen bada. Zentzu horretan azken mezu bat helarazi diote Pasaiako Udalari, “Portu Agintaritzak, beraz, udalak eman dezakeen erantzunaren zain geratzen da”.
Egunero herritar asko joaten dira paseatzera San Pedroko Ondartxo pasealekura. Guztiei eskerrak eman dizkie PPAk haien “laguntzagatik”.
