LGTBI+ Mahaiak txalotu egin du udalaren iniziatiba
Errenteriako Udalak, LGTBI+ Mahaiarekin elkarlanean, alarma egoeran LGTBIfobia pairatzen ari diren herritarrak artatzeko zerbitzua jarri du martxan. Entzuteko eta babeserako gunea izango dela azaldu du LGTBI+ Mahaiak, "elkar zaintzarako" baina baita ahalduntze kolektiborako sarea eraikitzeko lanabesa ere.
Errenteriako Udalak, LGTBI+ Mahaiarekin elkarlanean, alarma egoeran LGTBIfobia pairatzen ari diren herritarrak artatzeko zerbitzua jarri du martxan. Kasu horietarako bi telefono zenbaki, astelehenetik ostiralera, 09:00etatik 17:00etara arituko dira deiak jasotzen: 010 eta 943 449 600. Bertan deia artatzen duten langileen bidez, LGTBI+ Mahaia osatzen duten kideak harremanetan jarriko dira deitzen duten pertsonekin, zaintza eta laguntza eskaintzeko.
Ostiralean eman zuen zerbitzuaren berri udalak, eta Errenteria LGTBI+ Mahiak horren gaineko balorazioa egin du orain. Udalaren iniziatiba txalotu du mahaiak, eta gogora ekarri du LGTBI+ pertsonak sozialki isolatuago daudela, eta gainerakoek baino bakardade eta antsietate sentimendu gehiago izateko aukera handiagoa dutela, “COVID-19ak guztiei eragin dien arren, LGTBI+ komunitatearentzat berariazko ondorioak daude, gizarte estresaren aurrean talde zaurgarritzat hartu behar dugu beraz”.
Bereziki, nerabeengan jarri du atentzioa Errenteria LGTBI+ Mahaiak. Konfinamendu egoera kolektiboarentzat, eta zehazki talde horrentzat are gogorragoa izan daitekeela nabarmendu du, “askotan ingurune etsai gisa sentitzen baitute beren etxe ingurua”. Diskriminazio guztien artean, homofobia, lesbofobia eta transfobia direla etxe barruan mantentzen diren bakarretakoak ere esan du mahaiak, “horregatik, berrogeialdia dela eta, maitatzeko, harremanak izateko eta adierazteko modua errespetatzen ez duen ingurune batean bizi behar dute egunero, kalera ateratzeak dakarren laguntzarik gabe”.
Txalogarria dela udalaren iniziatiba gaineratu du mahaiak. Egoera hori aintzat hartuta, helduleku bat eskainiko dielako halako egoera bizi duten komunitateko kideei. Telefono deietan anonimotasuna errespetatuko dela nabarmendu dute, eta jasotako horiek LGTBI+ Mahaiko kideei pasako dizkietela udal langileek: “Mahaia osatzen dugun kideok gaizki pasatzen ari den edozein pertsona entzun eta babestuko dugu; husteko tresna da honakoa, elkar zaintzarako, eta ahalduntze kolektiborako sarea eraikitzeko lanabes, halaber”.
Egoeraren larritasunaren arabera, jasotako deiak udalez gaindiko beste zerbitzuetara bideratu ahalko dituztela zehaztu du mahaiak: “Berdindu eta abar”. Bi telefono zenbaki horiek eskura izango dituzte LGTBI+ komunitateko kideek, baina baita Errenteria LGTBI+ Mahaiaren posta elektronikoa eta sare sozialak ere, instagraman eta facebook.
