Pertsianak itxita, baldintza duinen eske
Pertsiana itxita jarraitzea erabaki dute Ostari Errenteriako Ostalaritza Elkartea osatzen duten 30 establezimenduek. Ateak zabaltzeko goizegi dela iritzi diote; ez direla betetzen bezero eta langileen osasuna bermatzeko baldintzak, eta gainera, ekonomikoki ere ez dela bideragarria.
Gaurko iniziatiban parte hartu duten ostalariak, Zumardian. Argazkia: Ostari Elkartea Konfinamenduaren arintzearekin batera, gaur zuten tabernek terrazak zabaltzeko baimena. Neurri zehatzak hartu behar izan dituzte; bezeroek ez dute taberna barrura eskatzera joaterik, terrazak kopuru zehatz batean mugatu behar dituzte, mahaien arteko gutxieneko distantzia bermatu, baita mahaian bertan esertzen direnena ere.
Neurriarekin ikuspegi kritikoa duten ostalariak badira. Ez dute ulertzen terrazak zabaltzeko presa, ezjakintasuna nagusi den agertoki batean, are gutxiago, beraien ustez, ez denean bermatzen langileen eta bezeroen osasuna, eta planteatutako neurriekin, gainera, taberna askorentzat bideragarria ere ez denean. Pertsiana itxita jarraitzea erabaki dute Ostari Errenteriako Ostalaritza Elkartea osatzen duten 30 establezimenduek. Ateak zabaltzeko goizegi dela iritzi diote; ez direla betetzen bezero eta langileen osasuna bermatzeko baldintzak, eta gainera, ekonomikoki ere ez dela bideragarria.
Beren establezimenduetako terrazak zergatik ez dituzten zabaldu azaltzeko, zein neurriarekin desadostasuna erakusteko agerraldia egin dute Ostariko 30 kideek gaur goizean. Zumardian egin dute agerraldia. Bertan erakutsi dute ezarritako baldintzekin ez duela zentzurik ateak zabaltzea. Gero, herrian barrena protesta egin dute, kartelak soinean, beren negozioak zabaltzeko baldintza duinak eta osasun bermeak eskatuz.
Haritz Ertzibengoa Gaztelumendi Gaztelu Ostatuko jabe eta Ostari elkarteko bozeramailearekin hitz egin du HITZA-k. Presa handia izan dutela ostalaritzako establezimenduak zabaltzeko salatu du Ertzibengoak.”Goizegi da gure ustez, eta osasun segurtasuna ez dago bermatuta. Negozio gisa, gainera, neurri horiekin ez da bideragarria gure egoera”. Moduekin, erabakitzeko erekin ere kexu azaldu da Ostariko kidea. Ez daude elkarte horretan Errenteria-Oreretako ostalaritza establezimendu guztiak bilduta, baina erreferentziazkoa da, eta Ostariko inork ez du gaur terraza zabalduko.
COVID-19ak eragindako osasun larrialdiak eragina izan duen zalantzarik ez dago, baita ostalaritzan ere: “Establezimenduetako batzuk oso txikiak dira, eguneko ekonomia dute, eta gaur sartu den dirua atzo gastatua zegoen. Horrelako egoera batek, are gehiago larriagotzen ditu berez zeuden baldintza horiek. Babestuta sentitzen ginen ERTE-ekin, baina neurri berriek aukera ematen digutenez zabaltzeko, eta ez irekitzea gure erabakia denez, ERTE-en inguruan penalizazioak sortuko dira. Baimena baldin baduzu, eta ez baduzu zabaltzen, hasi behar da langileen gizarte segurantzako kuotaren portzentaje bat ordaintzen. Bultzatzen ari dira zabaltzera, baina guk ikusten dugu ez dela bideragarria, osasun aldetik, eta ekonomikoki”.
Ateak itxita izanda ere, beste hainbat gasturi ere aurre egiten jarraitu behar dutela nabarmendu du Ostarikoak: “Alokairu gastuak ez dira eten, maileguaren kuotak, seguruak…”.
Babesa eskatu du Ostarik. “Babesa desagertzen hasi da poliki-poliki, eta denok ulertu dezakegu hau ez dela ez ekainean ez uztailean ere konponduko. ERTEak ekainaren 30era arte mantenduko direla esaten ari dira. murriztut.a baina mantenduko direla. Eta hortik aurrera zer? Udara ez da betikoa izango, aforoa mugatuta egongo da, segurtasun neurriak mantendu beharko dira ziurrenik. Horri begira, ez dugu sentitzen babes bat”. Beste eskaera, Ostariren arabera oso garrantzitsua, informazioa: “Zehatza. Ezinbestekoa da hori gure estrategiak erabakitzeko. Eusko Jaurlaritzak Euskal Herriko Agintaritzaren Aldizkarian atzo gauerdian argitaratu zuen neurria. Horrela hartu behar ditugu guk erabakiak? Ireki edo ez ireki erabakitzeko zer zioten itxoin behar duzu eta zortzi ordu lehenago atera dituzte baldintzak. Informazio zehatzik ez dago ondorioen gainean, erabakien gainean. Ez dira moduak gauzak egiteko”.
Establezimendu txikiak direla beraienak baina sektore “potentea” dela nabarmendu du Ertzibengoak: “Azkenean jende asko bizi gara sektore honetatik, familia asko. Gaude establezimendu arduradunak, baina daude langileak, daude hornitzaileak, jende mordoa”.
Erabakiak hartzeko garaian, tokian tokiko errealitateak aintzat hartzearen falta sumatzen duela esan du, gainera Ertzibengoak, “hori jada ikuspuntu pertsonala da, baina”.
Ostalariak irrikan daudela lanean hasteko, negozioen ateak zabaltzeko eta bezeroekin egoteko esan du azkenik Ertzibengoak, “baina nahi dugu modu duin batean izatea, gure zerbitzuen kalitate ona bermatuta, eta bideragarritasuna mantenduta”.
Ondoko bideoa eta argazkiak Ostari Elkartearenak dira.
