"Sistemari gutxien inporta zaizkion" emakumeak babesteko erresistentzia kutxa sortu dute
"Sistemari gutxien inporta zaizkion" emakumeak babesteko erresistentzia kutxa sortu dute SOS Arrazakeriak eta Oarsoaldeko Mugimendu Feministak.
SOS Arrazakeriaren etxeetako langileen sailak eta Oarsoaldeko Mugimendu Feministak bat egin dute “sistemari gutxien inporta zaizkion” emakumeak babesteko. Emakume horiek batez ere etxeko zaintzaile-langile gisara aritzen direnak dira, eta gehienek ere ez dute egoera erregularizatua administrazioaren aurrean. Koronabirusaren krisiagatik oso kolpatua izaten ari da sektore hori, eta Oarsoaldean oso egoera larrian dauden 40 emakume daudela antzeman dute. Haientzat gizarte babesa eta egoera erregularizatzea eskatu dute.
Muturreko egoeran bizi dira 40 emakume horiek, egitasmoaren bultzatzaileek esan dutenez. Datuok, etxeetan zaintza lanetan aritzen diren 250 emakumeri egindako inkestaren bidez lortu dituzte, jakiteko zein zen haien lan egoera, pertsonala eta familiakoa. Hala, emakume horiek zailtasun oso handiak dituzte, adibidez alokairuak ordaintzeko, jatekoa erosteko, edo familien beharrei aurre egiteko: bizitzeko duintasun eske ari dira. Egoera kritikoan daude. Eta administrazioaren aurrean, egoera erregularrean ez daudenez, ezin dute gizarte diru laguntzetara iritsi. Horregatik sortu dute erresistentzia kutxa.
Haiei laguntza helarazteko bi bide daude. Bat, Oarsoaldeko hainbat komertziotan jarri dituzten kutxetan dirua uztea da. Besteak crowfunding kanpaina batekin du harremana: esteka honetan sartuta, diru bilketa horrekin bat egin daiteke (informazio osagarria ere badago, tartean, non dauden dirua uzteko kutxak).
