Kukai Dantza Max Sarietan finalista, berriro
Gauekoak ikuskizuna Dantza Ikuskizun Onenaren atalean lehiatuko da.
Hizki handiekin idatzitako artea da beraiena, eta lan handiaren uzta jasotzen ari diren zalantzarik ez da. Kukai Dantzak, berriz ere, Arte Eszenikoen Max Sarien finalean hartu du lekua. Irailaren 7an jakinaraziko dituzte irabazleak. 386 ikuskizunek eman zuten izena, horietatik 159 izan dira hautagai, eta 35 iritsi dira azken fasera.
Kukai Dantza bere azken ikuskizunarekin heldu da arrotza ez duen agertoki horretara, Max Sarietako sagarra behin baino gehiagotan hozkatu duelako dagoeneko. Gauekoak ikuskizuna Dantza Ikuskizun Onenaren atalean lehiatuko da. Orain arte emaitza bikainak jaso ditu dantza konpainiak, eta hilabete batzuk tartean badira ere azken erabakia ezagutu arte, aukera guztiekin helduko da Kukai Dantza.
