Pasaiako hainbat errepide oinezkoentzat egokituko dira astebururo
Pasa den asteburuko arrakasta kontutan hartuta, Antxo, San Pedro eta Trintxerpeko hainbat kaleetan trafikoa murrizteari eutsiko dio Pasaiako Udaltzaingoak, epe mugagabean.
Antxotarrak Hamarretxetan kalean oinez ibili ahalko dira astebururo. Antxo, San Pedro eta Trintxerpeko hainbat bideetan trafikoa murriztu eta oinezkoentzat egokituko dira astebururo. Joana den asteburuko arrakastari jarraiki hartutako erabakia da, herritarrek hiru barruti horien hainbat bide nagusietan oinez ibiltzeko eskubidea izan baitzuten. Hortaz, Pasaiako Udaltzaingoak murrizketa horiei eutsiko die epemugarik gabe.
Hala ere, argi adierazi behar da trafiko murrizketak asteburuetan baino ez direla izango eta ordutegi jakin batean. Larunbatetan 16:00etatik 23:00etara murriztuko da eta igandeetan 8:00etatik 23:00etara. Pasai Antxon Hamarretxeta kalean ibili ahalko da, Kupeldegi eta Blas de Lezo kaleen artean. Garajeetarako sarbidea baina, baimenduta egongo da. San Pedron, Arraunlari kalean murriztuko da trafikoa, eta egoiliarrak baino ezingo dira sartu. Azkenik Trintxerpen, Euskadi Etorbidea oinezkoentzat egokituko da, Lasako bidegurutzetik, Correoseraino. Donibanerako berriro ere ez du aldaketarik iragarri udalak.
Irteerak baimenduta badaude ere, “irteera aktiboak” izan behar direla gogorarazi du udaltzaingoak eta eskatutako segurtasun neurri guztiak errespetatuz.
