Errimen neurrira moldatuko da gaur Kultur Labea
Arkaitz Oiartzabal Xamoa eta Aitor Albistur izango dira gaurko protagonistak Herri Biziaren agertoki berezian, eta 18:00etan eskainiko dute prestatu duten emanaldiaren estreinaldia.
Aitor Albistur, gaur Kultur Labean arituko den bertsolarietako bat. Bertsolaritzak hartuko du gaur Kultur Labea eta errima eta neurrietara moldatu. Arkaitz Oiartzabal Xamoa eta Aitor Albistur izango dira gaurko protagonistak Herri Biziaren agertoki berezian, eta 18:00etan eskainiko dute prestatu duten emanaldiaren estreinaldia.
Biharko Kultur Labea musika eta dantzarekin lotuta egongo da; Ander Fernandez eta Corine Cella arituko dira online emanaldia eskaintzen.
Duela hilabete pasa, apirilaren 9an, abiatu zuen Errenteriako Udalak Kultur Labea Errenteriako artista eta sortzaileei leiho bat zabaltzeko COVID-19ak eragindako krisiaren testuinguruan. Horretarako, Herri Bizia web orrian agertoki berezia atondu du, sorkuntza zabaltzen jarraitzeko. Programazio guztia, berariaz prestatutakoa da Kultur Laberako. Eneko Gil Kukai Dantzako dantzariak zabaldu zuen Kultur Labea eta diziplina askotariko sortzaileak aritu dira ordutik bertan emanaldiak eskaintzen: Idoia Hernandez eta Oskar Manso, Carmen Cepero, Alazne Etxeberria, Bertik, Andoni Aguirregomezkorta, Arrate Rodriguez, Lander Garro eta Ibai Maritxalar pasa dira bertatik, besteak beste.
Sorkuntza osasuntsu dago Errenteria-Oreretan, hala mantentzea da iniziatibaren helburua, elikatzea.
18:00etan estreinatzen dituzte emanaldiak astelehenetik ostiralera, baina ondoren nahi bezala eta nahi bezain beste aldiz ikus daitezke Herri Bizia web orrian.
