Patxi Ruiz euskal presoaren alde elkarretaratuko dira ostegunean
Patxi Ruiz euskal presoak bederatzigarren eguna bete du gaur gose eta egarri greban. Txantreakoari elkartasuna adierazi eta bizitzen ari den egoera salatzeko elkarretaratzea egingo du ostegunean, 20:30ean Zumardian, Herri Erantzunak.
Patxi Ruiz euskal presoaren alde Txantrean egindako elkarretaratzea. Argazkia: Ahotsa info Patxi Ruiz euskal presoak bederatzigarren eguna bete du gaur gose eta egarri greban. Txantreakoari elkartasuna adierazi eta bizitzen ari den egoera salatzeko elkarretaratzea egingo du ostegunean, 20:30ean Zumardian, Herri Erantzunak. Amnistiaren Aldeko eta Errepresioaren Aurkako Mugimenduak eman duen azken informazioaren arabera —atzokoa da— 14 kilo galdu ditu Ruizek, ikusmenarekin lotutako arazoak aipatu ditu, eta oraindik ez du konfiantzazko medikurik ikusi.
Murtzia II espetxean aurkitzen da Txantreakoa.
Duela bederatzi egun ekin zion gose eta egarri grebari Ruizek. Espetxean protestak egiten ari zen beste hainbat euskal presorekin batera COVID-19ak espetxeetan duen eraginaren aurrean neurriak har ditzaten eskatzeko. Horietako protesta bat amaitzean, hainbat funtzionario bere ziegara joan eta mehatxatu egin zuten. Testuinguru horretan erabaki zuen Ruizek gose eta egarri greba hastea.
Bizi duen egoera salatu eta elkartasuna adieraziko diote beraz, ostegunean, eta elkarretaratzean COVID-19aren harira ezarritako higiene eta segurtasun neurriak kontuan hartzera deitu dute antolatzaileek. Hala, maskara eta eskularruak ematea eskatu dute, eta bakoitzak eraman dezala banderola edo aldarrikapenerako euskarria. Pertsonen arteko segurtasunerako distantzia fisikoa ere mantenduko dute.
