Kultura eta hizkuntza guztiekiko aitortza egin du udalak
Kultur Aniztasunaren Eguna da gaur, eta horren harira adierazpen instituzionala egin du Errenteriako Udalak.
Kultur Aniztasunaren Eguna da gaur, eta horren harira adierazpen instituzionala egin du Errenteriako Udalak. Aniztasun kulturala herritarren ondare komuna dela esan du udalak adierazpen horretan UNESCOren Adierazpen Unibertsalean jasotako hitzak bere eginda. Aniztasun biologikoa bezala, hau da, biodibertsitatea, pertsonen aniztasun kulturala gorde eta zaindu beharra dagokiola gizarteari esan du, “milaka landare eta animali espezie desagertzen ari diren bezala, milaka hizkuntza eta kultura desagertzen edo hilzorian daude gaur egun munduan. Bi dimentsioak babestea, naturarena eta horren barnean pertsonon aniztasunarena, ahalegin beraren parte dira”.
Kultur eta hizkuntza aniztasun hori, lehen eskutik ezagutzen du Errenteria-Oreretak, eta hura altxorra dela jakinik, zaintzeko lanean dihardu, “pertsonon ondare kultural honen babesari eta zaintzari begira, Errenteriak badu bere erantzukizuna”.
Elkarrekiko babesa eta zaintza lantzea, geroaren zutabe nagusienetakoa da udalaren ustez, eta ezinbestekotzat jo du hizkuntza eta kultura aniztasun hori babesteko, herritatartasuna aitortzea egoera latzenetan dauden pertsonei, eskubide ororen jabe izango diren herritar oso izan daitezen, “izan ere, ezin dugu ahaztu jasaten ari garen pandemiaren harira altxortzat balioesten ditugun hizkuntza-kultura horietako askoren eroaleak diren herrikide etorkinak, egoera zaurgarrian daudela; bereziki egoera administratibo irregularrean dauden herrikideak”.
Horren harira, gaur egindako adierazpen instituzionalean Errenterian erroldarik ez duten herrikideak identifikatzeko konpromisoa hartu du udalak, “errealitate honen inguruko diagnostikotik abiatuta pertsona hauen eskubideak bermatuak izan daitezen urratsak emateko”. Eragile ezberdinekin lanketa bateratuak egiteko konpromisoa ere hartu du, sortu berri den Elkarbizitzarako eta Gizarte Ekintzarako Udal Kontseiluaren bidez. Herriko gazteenekin hezkuntza esparruan lanean aritzeko konpromisoari ere eman diote tartea kultur aniztasunarekiko errespetuan hezten jarraitzeko.
Errenteriak duen hizkuntz eta kultur aniztasuna balioan jartzeko konpromisoa,hizkuntza guztiei aitortza egin eta ezberdinen arteko topaguneak sortuz.
