Uztargi eta Goialde haur eskoletako matrikula epea zabalik da
2019 eta 2020an jaio diren haurren gurasoek, Uztargi eta Goialde haur eskoletan matrikula ditzakete gaurtik hasi eta ekainaren 8ra arte. Izena emateko bi modu daude, telematikoa haur eskolen web orrian sartuta, edo presentziala. Azken hori ekainaren 1etik 8ra bitartean izango da 09:00etatik 14:00etara.
Uztargi Haur Eskolaren kanpoaldea. 2019 eta 2020an jaio diren haurren gurasoek, Uztargi eta Goialde haur eskoletan matrikula ditzakete gaurtik hasi eta ekainaren 8ra arte. Izena emateko bi modu daude, telematikoa haur eskolen web orrian sartuta, edo presentziala. Azken hori ekainaren 1etik 8ra bitartean izango da 09:00etatik 14:00etara.
2019an eta aurten 309 haur jaio dira Errenteria-Oreretan eta horien guztien etxeetara bidali du gutuna udalak, Uztargi eta Goialde haur eskolen eskaintza zuzenean ezagutu dezaten. 0-2 urte artean, hazkuntza eskaintza zabala dagoela udalerrian gogorarazi du gainera, “aniztasun horrek ekosistema aberatsa eskaintzen digu hezkuntzaren eremuan, familien eta haurren beharretara ondoen egokituko den eskaintza hautatzeko aukera eskainiz”.
Hautu hori herriko haur eskoletan egitera eta D eredua lehenestera gonbidatu ditu familiak, eta haur eskolek jendartean betetzen duten funtzio hezitzaile eta soziala aitortu du, “zaintza, garapen pertsonal eta sozialaren erdigunean jarriz”.
Udal haur eskolen ezaugarriak
Eusko Jaurlaritzak ezarritako ratioen arabera 0-1 urteko gelan zortzi haur egon daitezke gehienez, eta 1-2 urtekoen gelan, berriz, hamahiru. Uztargin zein Goialden bi hezitzaile daude etengabe haurrekin eta hezitzaile horiek dira haurrei jaten eman eta lotararazten dituztenak.
Goialde haur eskolan bi gela daude eta etxeko giroa, familiartekoa bermatzen dela esan du udalak. Aparkatzeko arazorik ez dago bertan, hezitzaileek etengabeko formazioa jasotzen dute, eta haurren mugimendu librea errespetatzen da. Uztargik bost gela handi eta belarguneak ditu. Sukaldari bertan da eta egunero prestatzen du janari ekologikoa. Ordutegia, bietan, bera da, 07:30etik 17:00etara.
Ate irekien kanpainarik ez dute egingo aurten, osasun krisiagatik.
