Udalaren "utzikeriaren" aurrean, elkarretaratzea deitu dute biharko ostalariek
Haien etorkizuna arriskuan dela ikusarazteko, elkarretaratzea egingo dute bihar Trintxerpeko alkateordetzan 12:00etan. Pasaiako Udalari iragarritakoak betetzea eskatuko diote.
Ostalariek eguerdirako deitu dute elkarretaratzea, Trintxerpeko Alkateordetzaren aurrean. Pasaiako ostalariak “suminduta” daudela adierazi dute gaur ohar baten bidez. Suminduta, COVID-19aren aurrean, udalak ostalariekiko izan duen “utzikeria” dela eta. “Abandonaturik” sentitzen direla adierazteko, elkarretaratzea egingo dute bihar Trintxerpeko alkateordetzan, 12:00etan. Pasaiako ostalari askok ziurgabetasunez betetako etorkizun bat dute aurretik. Halako egoera berri baten aurrean, udalak “informazioa eta laguntza” ematea espero zutela adierazi dute. Baina orain arte ez dute esperotako sostengua jaso.
Ostalariek oharrean azaltzen dutenez, hilaren 5ean Izaskun Gomez alkatearekin bildu ziren, emango ziren urratsen berri izateko. Premiazko hainbat gai jorratu zituzten bileran. Diru-laguntzen ingurukoak, une hartan zehaztea ezinezkoa zela adierazi zien alkateak. Zergak ordaintzen jarraitu beharko dute, baina gero itzuliko zaie egindako ekarpena. Oharrak dionez gainera, musukoak eta gelak lortzen laguntzeko prest agertu zen Gomez. Bigarren bilera bat ere iragarri zuen udal gobernuburuak, hurrengo asterako.
Gaurko egunez, udalaren berririk jaso gabe jarraitzen dutela jakinarazi dute Pasaiako ostalariek, “maiatzaren 5ean genuen ezjakintasun bera dugu. Are gehiago, Udaltzaingotik zein Ertzaintzatik iristen zaizkigun mezuak kontraesankorrak dira, zergak ez zaizkigu itzuli, ez dakigu nola zabaldu edo jar ditzakegun terrazak, gainera faktore ekonomikoak gure taberna asko arriskuan jarri ditu, akaso betirako”. Haien egoeraz ohartarazteko, eta ostalaritzaren sektoreak egindako “ekarpen soziala” defendatzeko mobilizatuko dira bihar Trintxerpen ostalariak, baita nahi duten herritarrek ere.
Inguruko udalak eredu hartuta, “ekarpenak” egin ditzala eskatu diote Pasaiako Udalari, betiere nabarmenduz ekonomikoez gain, bestelakoak ere izan daitezkeela ekarpenak. Gauzak horrela, eskari hauek dira bihar jarriko dituztenak mahai gainean:
- Udaltzain zein Ertzaintzarekin eztabaidak ekidite aldera, udal ordenantzak idatziz irits daitezela, ez ahoz.
- Establezimenduen eta terrazen plaza kopurua zehaztea eta eskuzabaltasunez jokatzea.
- Udalak, ostalariekin batera, elektrizitate enpresei eskatzea tasak establezimenduek har dezaketen jende kopuruaren araberakoak izatea.
- Udal zergak, ostalarien salbuespenezko egoerara egokitzea.
