Espero zenaren konfirmazioa iritsi da: mendekosteak, bertan behera
Espero zenaren konfirmazioa iritsi da: mendekosteak, bertan behera. Gaur egin du jakinarazpen ofiziala udalak. Bi diana izango dira asteburuan.
Zabarre pirata, portura iritsi berritan. COVID-19ak eragindako osasun larrialdi egoera dela-eta aurten ez da Mendekoste Jairik izango Lezon. Ostiralean ziren hastekoak. Jakina zen herritar askoren artean berria, baina gaur eman du horren konfirmazio ofiziala udalak. Beraz, Zabarrek eta enparauek 2021era itxaron beharko dute lezoarrekin batera urteko lehen jaiak ospatzeko. Ikusteko dago iraileko santakrutzekin zer gertatuko den.
Lezon jai giroa izan behar zela oroitzeko, larunbatean eta igandean, goizez, bi diana antolatu ditu Jai Batzordeak herriko txistulariekin (segurtasun neurriak mantenduko dituzte). Aldi berean, balkoi eta leihoak mozorrotzera deitu dituzte.
Udalak herritarrei eskatu die jai egunak izan beharko liratekeen horietan arduraz jokatzeko, festak etxean ospa ditzatela, betiere beharrezkoak diren neurriak bere eginez. Lezoko erizainen Zure ardura, nire babesik onena kanpaina jarri dut eredutzat udalak herritarrek jaien aroa izan behar zena ganoraz igaro dezaten.
