[Galeria eta bideoa] Haien etorkizunen defentsan, kalera atera dira ostalariak
Antxo, Donibane, San Pedro eta Trintxerpeko ostalariek udalak haiekiko duen "utzikeria" salatu dute gaur. Segurtasun neurriak betetzeaz arduratu dira.
Elkarretaratze zaratatasuan gutxieneko tartea bermatzen ahalegindu dira uneoro. Berriz ere ateak zabaldu ahal badituzte ere, COVID-19ak eta hari lotutako krisialdi ekonomikoak ataka larrian jarri ditu Pasaiako ostalariak. Udalak “abandonaturik” dituela salatzeko, elkarretaratzea egin dute eguerdian, Trinxerpeko Alkateordetzaren pareko plazan. Txilibituak ahoan zituztela, indar erakustaldia izan da egin dutena, lau barrutietako ostalarien batasuna irudikatu baitute bertan.
Dena dela, arduraz jokatu dute uneoro. Gutxieneko tartea bermatu da oro har, baita pankarta eusten ari zirenen artean ere. 100 ostalari inguruk hartu dute parte protestan eta ia guztiek zuten musukoa jantzita. Bizi duten egoera larriaz ohartarazi zuten atzo ostalariek ohar baten bidez. Bereziki “suminduta” agertu dira, udalak haiekiko izan duen “utzikeria” dela eta.
Iragarritakoa betetzea eskatu diote gaur. Izan ere, hilaren 5ean batzartu ziren lehen aldiz Izaskun Gomez alkateak eta ostalariak. Gomezek astebete beranduago haiekin harremanetan jarriko zela adierazi zien orduan. Baina gaur gaurkoz, ez dute alkatearen berririk izan. Haien etorkizuna “arriskuan” izan daitekeelakoan, ostalariek argi dute; alkatea haiekin bildu ezean mobilizazioekin jarraituko dute.
HITZAk honako irudi hauek bildu ditu gaurko elkarretaratzean.
