[Bideoa eta galeria] Patxi Ruizen aldeko mobilizazioek ez dute etenik
Patxi Ruiz Txantreako euskal presoak hamazazpigarren eguna egin du gose greban gaur; lehenengo hamabietan, egarri greba ere egin du. Egunero ari dira Ruizi elkartasuna erakutsi eta Murtzia II espetxean bizi duen egoera salatzeko protesta egiten Errenteria-Oreretan.
Patxi Ruiz euskal presoaren aldeko mobilizazioa Gaztañon barrena. Argazkia: Herri Erantzuna Patxi Ruiz Txantreako euskal presoak hamazazpigarren eguna egin du gose greban gaur; lehenengo hamabietan, egarri greba ere egin du. Egunero ari dira Ruizi elkartasuna erakutsi eta Murtzia II espetxean bizi duen egoera salatzeko protesta egiten Errenteria-Oreretan. Atzo ere egin zuten manifestazioa.
COVID-19aren osasun larrialdiaren aurrean babes eta osasun neurriak har zitzala eskatzeko protesta egin zuen Ruizek beste euskal preso batzuekin batera. Protesta horietako baten ostean, kartela kendu zion espetxe funtzionario batek, eta ondoren euskal presoaren ziegara joan ziren eta hura mehatxatu. Testuinguru horretan ekin zion gose eta egarri grebari Ruizek.
Ruizen aldarrikapen taula, hemen ikus daiteke.
Une honetan Murtzi II espetxeko erizaindegian aurkitzen da Ruiz, ospitaletik espetxera eraman zutenetik —joan den ostiralean ospitalera eraman zuten euskal presoa agindu judizial bat tarteko bere osasun egoera larria zela eta— berrogeialdian jarri dute, eta modulu horretan izango du espetxeak ekainaren 9ra arte. Berrogeialdian dagoen bitartean ezingo du abokatuaren bisita jaso euskal presoak, ezta COVID-19aren testuinguruan Mutzia II espetxeak baimendu dituen bideo deirik egin ere, Amnistiaren Aldeko eta Errepresioaren Aurkako Mugimenduak jakinarazi duenez, “modulu horretan estaldurarik ez dagoela dio espetxeak”. Horrenbestez, babes juridiko eta mediku gehiago behar dituenean are isolatuagoa dutela Ruiz salatu dute.
Hamarnaka lagunek erakutsi zioten elkartasuna Ruizi eta gainontzeko euskal presoei Errenteria-Oreretan, atzo. Egunero egiten dituzte protesta horiek, 20:00etan abiatuta, eta ostiraletan 20:30ean hasita, euskal preso iruindarrak borroka mantentzen duen bitartean. Amnistiaren aldeko eta Errepresioaren Aurkako Mugimenduak iragarri du, bestalde, hilaren 30ean —larunbata— mobilizazio nazio eguna antolatu dutela Ruizen egoera salatu eta amnistia aldarrikatzeko.
Argazkiak eta bideoa Herri Erantzuna, protestaren deitzaileak egindakoak dira.
