Dolu-xingola armarrian, mina arintzeko
COVID-19aren osasun larrialdian bizitza galdu dutenak gogoan, haga erdian dira herri sarrerako ikurrinak eta herriko armarria eta dolu-xingola duen bandera jarri dute udaletxean.
Errenteriako udaletxea. Ez ohiko moduan egin zuen atzo udalbatzak ohiko saioa. Gai ordenatik kanpo, plenoa hasi aurretik, gogoan izan zituen Aizpea Otaegi alkateak udal korporazioaren izenean COVID-19aren osasun larrialdian bizitza galdu dutenak eta euren gertukoak. Udalbatzarenak, maitasun eta goxotasun hitzak izan ziren, lehen omenaldi xumea, joandakoen gertukoen barruetaraino sartutako mina arintzeko. Pena handia, txikitik bada ere osatzeko ukendua.
Ezinbestekotzat jo zuen Otaegik, maite direnak hiltzen laguntzea, azken egun eta orduetan akonpainatzea, behar bezala agurtzea eta hildakoaren senide eta lagunek elkarrekin eta babestuta egoteko aukera izatea, “bai bizitza galtzera doana ahalik eta ondoen joan dadin, bai hemen geratzen garenok dolua ahalik eta ongien egin dezagun ere”.
Azken hori izanda, zalantzarik gabe, COVID-19aren ondoriorik lazgarriena: bakarrik hiltzera kondenatu ditu hamarnaka eta hamarnaka pertsona, eta horren jakitun, hilko ziren gertukoen ondoan izateko aukera ukatu die beste hainbesteri, horrek suposatzen duenarekin. Errealitate gordina, “berez erraza ez den hori konfinamenduak ikaragarri zaildu eta sufrimendua areagotu du”.
Herri ordezkari diren gisa, min hori arintzen laguntzeko ardura sentitzen dutela esan zuen atzoko saioan Otaegik korporazio osoaren izenean; horretarako, baldintza egokiak ematen direnean joan direnak gogoan izan eta ingurukoei babesa adierazteko ekitaldia egingo dute, “bitartean, modu xume honetan bada ere, joan direnei adiorik ez, eta ingurukoei besarkada bana”.
Ekitaldia egiteko baldintza egokien zain dira, baina atzoko keinu xumeaz harago, eta ekitaldia antolatu arte, Errenteriako sarreretako ikurrinak haga erdian izango dira, eta herriko armarria eta dolu-xingola dituen bandera jarri dute udaletxean.
Izan bekizue lurra arina.
