Elkarrekin Errenteria-IU: "Aitortza merezi duen esfortzua egin du herriak"
Madalenetako omenduen izendapena hutsik uztea onartu zuen atzo plenoak, aho batez. Horren gaineko prentsa oharra helarazi du Elkarrekin Errenteriak-IUk gaur komunikabideetara.
Errenteria Elkarrekin Podemos koalizioak programa aurkeztu zueneko argazkia., iazko maiatzean. Madalenetako omenduen izendapena hutsik uztea onartu zuen atzo plenoak, aho batez. Horren gaineko prentsa oharra helarazi du Elkarrekin Errenteriak-IUk gaur komunikabideetara. Izendapena hutsik utzita ere, atzoko plenoan adostutakoaren bidetik, aitortza egin nahi izan dio errenteriarrek egindako esfortzu kolektiboari.
COVID-19ak egunerokoa “hankaz gora” jarri duela esan da, datozen asteetan eta hilabeteetan ere ohiko errealitatea ez dela itzuliko nabarmendu du, “ezta hain gurea den, hainbeste maite ditugun madalenak ere. Errealitate honetan ezinezkoa da ospatzea gustatuko litzaigukeen moduan, kalean, familiarteko topaketetan, eta baldintzatu egingo ditu berriz elkartzea, ekintzak, eta aitortza ekitaldiak”. Urtero omentzen du udalak jaietan bere ibilbideagatik komunitateari ekarpena egiten dion norbanako edo elkartea, “egun bizi dugun egoerarekin, ezinbestekoa litzateke, ordea, inor omentzea merezi moduan, eta egiten duen ekarpena ikusaraztea merezi bezala. Ez litzateke bidezkoa, aurretik egindako aitortzen ezberdina litzatekeelako baldintzengatik. Merezi duten eta merezi dugun moduan omendu behar ditugu, besarkatuta eta aitortza horren goxoa sentituta”.
Desiragarriak ez diren egoera asko bistaratu ditu COVID-19aren krisiak Elkarrekin Errenteria-IUren ustetan, “baita gizarte eredu honek dituen beharrak. Errenterian behar horiek erantzuten ari gara. Errenteriarren gehiengoa eredugarria izan da, norbera zaintzea, elkar zaintzea dela erakutsi du, norbera babestea, besteak babestea dela, norbera laguntzea elkarri laguntzea dela. Gu bat, komunitate bat, herri bat. Guztiak izaten ari gara solidarioak eta erantzunkide, jakin badakigulako hau dela krisi honi eta utziko dituen ondorioei aurre egiteko bidea”.
Komunitatearen esfortzuari aitortza egin nahi ziotela atzoko botoarekin gaineratu du azkenik Elkarrekin Errenteria-IUk, “Zaintza Sare publiko komunitarioarekin bat egin duten boluntarioen eta eragile sozialen lanari aitortza; oinarrizko zerbitzuetako langile guztiei aitortza: osasungintza langileak, garbiketa langileak, administrazioko langileak, udaltzaingoa, babes zibila, adinekoen egoitzetako langileak… Zaurgarrienak diren gure adinekoak lagundu dituzten guztiei aitortza; eta tokiko komertzioari eta horren atzean dauden pertsonei gure oinarrizko beharrak asetzeko esfortzu ikaragarria egin dutenak krisi honetan. Orain , inoiz baino gehiago behar dute gure babesa krisiaren fase berri honi aurre egiteko, eta Errenteriako kaleak bizitzaz betetzen jarraitzeko”.
Zaintza eta babes lana egin duten bizilagun guztiei aitortza publikoa egin die, “eskerrak eman guztiei, egoera honetatik elkarrekin aterako garelako. Komunitate gisa, indartuta”.
