Marrazki bizidunak "elkarrekin sortzeko" dinamika abiatu dute Oiartzunen
Ventana a la diversidad arte komunitateak, Haziak egitasmoak eta Abaraxka ludotekak sormena lantzeko proposamena luzatu diete adin guztietako herritarrei.
Adin guztiei zuzendutako dinamika martxan jarri dute VEDIk, Haziak-ek eta Abaraxkak. [Argazkia: VEDI] Marrazki bizidunak sortzen ikasteko proposamena luzatu diete Abaraxka ludotekak, Haziak egitasmoak eta Ventana a la diversidad (VEDI) arte komunitateak oiartzuarrei. Adin guztietako herritarrei zuzenduta dago dinamika, eta jasotako ekarpenak beste herrialdeetakoekin batera erakusgai jarriko dira, “elkarrekin guztion ingurua elikatzeko”.
Hala, kutxa magikoa sortzeko proposamena egin dute lehenbizi dinamikaren bultzatzaileek. Marrazki bizidunak sortzeko tresna izango da kutxa magikoa, eta dagoeneko, beste hainbat proiektuetan erabili dute VEDIk eta Haziak-ek, esaterako, Ametsen basoa liburuan oinarritutako marrazki bizidunak sortzeko (albistearen bukaeran ikus daiteke bideoa). Oarsoaldeko eta Oaxacako (Mexiko) umeek eman zioten bizia marrazkiei, eta kontaketa euskaraz zein mixtec hizkuntzan egin zuten.
Ondoren, konfinamenduarekin lotutako mikroipuinak sortzeko proposatu dute dinamizatzaileek, “nola bizi dute egoera hau zuen seme-alabek? eta zuek? zer botatzen dute/duzue faltan? Zein alderdi positibo ditu?…”. Eta azkenik, sorkuntza lana VEDIrekin, Haziak-ekin edota Abaraxkarekin parteka dezakete parte hartzaileek, baita marrazkiak sortzeko proposamen berriak egin ere. Jasotako bideoekin galeria osatuko dute antolatzaileek.
Kutxa magikoa nola eraiki azaltzen du ondoko bideoak.
