Astelehenean alkatearekin bilduko dira Pasaiako ostalariak
Haien egoeraz ohartarazteko, bat egin zuten atzo berriz ere Pasaiako ostalariek; taberna eta jatetxeak ordu erdiz itxi zituzten lau barrutietan.
Pasaiako ostalariek taberna eta jatetxeak ordu erdiz itxi zituzten atzo. Pasaiako ostalariek jakinarazi dute, Pasaiako alkate Izaskun Gomezek haiekin batzartzea eskaini ziela atzo. Hainbat ostalarik HITZAri jakinarazi diote, baietz esango diotela eta gaur bertan jarriko direla harremanetan bilera hura astelehenean egiteko. Iturri berdinek nabarmendu dutenez, “ostalarien protestek” eragina izan dute.
Antxon egindakoa, ostalariek deitutako bigarren elkarretaratzea da.
Izan ere, atzo arratsaldean Pasaiako ostalariak kalera atera ziren berriz ere, COVID-19ak haien sektorearengan izan duen kalte ekonomikoaz ohartarazteko. Atzoko 19:00etan elkarretaratzea egin zuten Antxoko Gure Zumardian; protesta, ordea, urrats bat aurrerago eraman zuten, 19:00etatik 19:30tara Antxo, Donibane, San Pedro eta Trintxerpeko tabernak itxi egin zituzten ostalariek.
Bigarren fasean zertxobait malgutu dira taberna eta jatetxeen segurtasun baldintzak, eta orain barruan ere kontsumitu daiteke. Dena dela, ostalariek “lan egin ahal izateko erraztasunak” behar dituzte, betiere “segurtasun neurri guztiekin”. Batez ere, “jarraibide zehatzak eta babesa” nahi dituzte udalaren aldetik.
Jarraibide zehatzak, ez baitakite nola jokatu; udaltzainek eta ertzainek “gauza kontrajarriak” adierazten dizkietela diote. Inguruko udalak eredu hartuta, “babesa” ere eskain dezala eskatu nahi diote Pasaiako Udalari, betiere nabarmenduz ekonomikoaz gain, bestelakoa ere izan daitekeela babesa.
